MINGLANILLA PARISH SCANDAL

Ang nahitabo sa atong Parokya karon, ato ra usab nga kapildihan.  Okey ra nga mosumbong apan dili okey ang pagsigig yawit-balik niini ug ang pagsibya-ungkat sa mga nangaging kabanata kay molanat ug dugay ang pag-hupay sa kasakit gikan sa dilang tampalasan.

Tinuod anaa kanato ang pagkamahitas-on busa dili nato kapugngan ang pagsigeg latigo sa atong isig-kaingon nga nakalapas sa maayong gawi o sa balaod.  Gusto kitang moapil sa kagubot pinaagi sa pagduot sa nakasala imbis unta atong tabangan ilabi nag ang hingtungdan kanhi atong gipangga.  Tingali ingon niini ang gidangatan sa atong Kaparian  nga sa dugayng panahon atong gisuportahan ug gipangga ug nga karon gusto na usab natong bitayon patiwarik.

Unya bag-ohay pa lang gilabayan pa gayod ug lapok ang Lawas mismo nga atong gisaligan sa espiritual nga kalambo-an – ang Simbahang Romano Katoliko – pinaagi sa paghisgut sa mga kasalanan sa mga nagdumala niini sa nanglabayng mga siglo.   Gihisgutan kadtong mga Pari ug mga Santo Papa nga nalambigit sa mga eskandalo sekswal, pamilya ug ang mga anak nga nahimong mga Santo.  Gitumbok pa gayod ang mga “aktibo sa sex” ilabi na kadtong Santo Papa sa tuig 1045 kinsa “migawas pagka-santo papa ug nagminyo.”  (Ang kinatibuk-ang estorya niini atong mabasa sa Facebook Page sa Parishioners of the Shrine of Mary (IHMP) Minglanilla.

Dinhi wala makapugong si Brod Roy Paraiso sa iyang nabasahan busa siya nangutana: 

“unsay tomong og toyo nimo to mention this dark part of our church history?....at this turbulent period of our beloved parish???......every person/family and community has its own mysterious past......but why sing  joyful songs during FUNERAL!!!”

Natandog ako sa mga gipahayag ni Brod Roy.  Ang nahitabo kaniadtong mga panahona nga giila nga usa ka maitom nga bahin sa kaagi sa Simbahang Katoliko nahuman na ug dili na lang unta banhawon pa aron matuki pagusab uban sa nahitabo sa atong Parokya.

Kun unsa ang mahitabo sa lima nga sila Padre Ladie, Padre Joey, Padre Nanie, Padre Oscar, ug Padre Jojo anaa na sa mga kamut sa Arsobispo.  Katungdanan na nato karon ang pag-ampo kanila ug pagpangayo ug pasaylo sa Diyos sa ilang mga binuhatan diin kadaghanan kanato wala gayoy hustong kaalam.  Hinaot pa unta nga ang atong aksiyon sa eskandalo dili mas bug-at pa sa gipas-an karon kanila.

Atong sampiton ang Mahal nga Birhen nga gabayan kita kanunay aron dili maguba ang Parokya sa Iyang Putli nga Kasingkasing.  

Mao na kini ang katapusan kong paghisgut sa kagubot karon sa Minglanilla. 
Jan. 21, 2012:  Sori kaayo nga hangtud karon nagsigi gihapon kog komenaryo sa mga hitabo apan kini gumikan sa mga dili mohunong nga panagbingki-ay sa mga tawo nga dapat unta magbinati-ay na.