SI FATHER O SA MINGLANILLA

Sa pagtikyop sa tuig 2011, nahuman usab ang Pasko sa Parokya nga akong nasinati sa unang higayon.  Ug dinhi ning maong kalihokan adunay tawo nga nakadani sa akong pagtagad bisan tuod gikan sa halayo lamang kay ang akong pangilabot sa maong kalihokan medyo may pagka-taphao man.

Serioso ug detalyado kong magplano ingog mahadlok mapakyas sa iyang buot buhaton.  May barog nga kataha-an nga kon ikaw maduol kaniya bisan hangtud sa ika-upat ka higayon maka-ingon gayod estrikto ug may pagkama-ot kining tawhana.  Gani kining akong hubad-tanaw sa tawo ilawom sa sutana mikabat ug pipila ka bulan kinuyugan sa mga tocar de oido gikan sa iyang mga higala ug mga distraktor usab.

Aduna siyay kina-iya nga mo-antos apan dili molutos.  Moratrat apan dili alingisig.  Mapursige apan maantigo sa obrang kinaugalingon.  Kugihan ug lunod patay nga mo-suporta sa kawsa ug mga kauban.  Nagpahipi diha kaniya ang pagka-perfectionista.

Sa unang higayon nga mitambong ako ug miting nga siya ang nagpatawag, namatikdan nako nga iya nang gihan-ay ang mga umaabot nga buluhaton ug si kinsa ang dapat mopatuman niini.  Gihimo niya kini samtang ang mga nanambongay naglibog kon unsay buhaton. Mao kini ang kabahin sa Fiesta de Minglanilla, nga sa unang higayon gisangon sa mga Kapelya sa Parokya.  Usa sa mga gikasabutan mao ang dies porsiyentong bahin alang sa mga kapelya nga pagakuhaon sa malikom nga donasyon.  Usa kadto ka dalaygong paagi pampagana ug pambalansi sa nagkadaghan ug nagkadagko nga pagpa-amot sa Simbahan.

Pagkasunod miting naing-gao ang gikasabutan busa bunot-bulsa gihapon ang ubang mga opisyales sa Kapelya sa binulang balayranan sa suga, tubig, ug uban pa.  Dismayado ang nanagla-om nga mo-usad na gayod ang ilang mga proyekto.

Ang hinungdan sa ilang pagkahugno mao ang kagustuhan sa laing partido nga wala makatambong sa nahaunang miting nga wagtangon ang dies porsentong pahalipay nga nasabutan na.  Ug ang matigom human sa piyesta ihatag isip tabang sa Kapelya apan unahon kadtong mas labing nagkinahanglan niini.  Samag gisagpa sa makadaghan ang tawo nga nangamahan sa maong proyekto - si Padre Oscar Ornopia. Nanglipaghong ug  wala  dayon makatingog sa dihang giguba ang iyang gipasalig sa mga Zones ug Chapel Officials nga nahibulong kaayo sa sitwasyon.  Dinhi mituyhakaw ang akong pagduda nga may kuwalisyon ug kompetisyon diay sulod sa Kombento.   

May mga tawong nahimuot sa maong hitabo apan ang mga kasingkasing sa mga taga-Kapelya nagpabiling malaomon alang kang Padre O.   Napamatud-an kini diha sa di-malalis nga pagsuporta sa Piyesta ug sa ubang proyekto sama sa Dagan Kaayuhan, Sportsfest, Pangindahay, ug ang masadya ug malamposon nga Pasko sa Parokya.   Ang naulahi suportado usab sa mga grupong pribado, relihoyoso, ug gobierno.  Gani ang halangdong Arsobispo sa Sugbo mituyo gayod ug hapit sa Minglanilla aron mohatag sa iyang pakigpulong sa okasyon petsa 30 ning bulan.

PASKO SA PAROKYA 2011

Kining tanan nagapamatuod sa bahandi ni Padre Oscar – sa iyang dedikasyon sa trabaho, sa iyang mga pag-giya ug pag-unong –  sa mga hiyas nga nakagamot na sa mga kasing-kasing sa iyang gi-alagaran ug gikauban. Bahandi nga sama sa Parol nga Bitoon andam modan-ag ug mosanag sa sunod tuig 2012