Apasumpay sa: BARANGAY WARD 4 – MOAWAS NA USAB ANG SAPA KABUNGAHAN?

MIPAKITAG GAMAYNG KA-ISOG ANG SAPA KABUNGAHAN

Disyembre 27 - Maayo gani dili kaayo kusog ang baha sa paborito kong Sapa Kabungahan Barangay Ward 4 Minglanilla.  Nabalaka ako sa kahimtang sa panahon pagkahuman gayod sa Misa sa Pasko kay misugod dayon pagdagtom ang Langit ug daw ingon sa mobuhagay na ang daghang tubig gikan sa mga water arteries sa mga silingang Barangay Vito-Cadulawan.

Sayo ning buntag, akong gi-aninaw ang kahimtang sa Sapa Kabungahan ug nakita ko nga nagkalawom kini tungod kay gianod na usab ang mga balas ug bato padulong ngadto sa ubos.  Ang pag-sige ug lawom ning maong sapa ma-undang lamang kong kini pagahimu-an ug barikadang semento sama ug spillways nga ana-a karon sa Sapa Mananga aron mapugngan ang pagdahili sa balas-bato nga maka-guba mismo sa dakong taytayan.

Ang Kahimtang Karon sa Gi-aling Puthaw

Ang dapit diin may gi-aling puthaw nahimo na karon nga usa ka dakong tambakan sa mga anod ug bisag kalag na lang sa mga tawong mipasalig kono paglimpiyo sa maong dapit wala mopatim-aw.  Sa kahinay sa tubig ug kanihit sa mga anod sa miaging duha ka adlaw, ang gi-aling puthaw wala na maka-agwanta ug nabawog gayod.  Ug may panghinaot nga sa sunod dakong pagbaha madala na kini ngadto sa Barangay Ward 2 kuyog ang mga gapnod.

May mapaabot bang pag-aksyon ang mga molupyo gikan sa mga opisyales sa Ward 4, Ward 2 o sa Munisipyo ba?  Aduna apan morag inig kahuman na sa sunod nga pag-awas sa Sapa Kabungahan kada 8 - 10 ka tuig.

ILEGAL ANG MAONG GI-ALING PUTHAW.