WALI UG SUMBONG

Usa ka gabii niana nakit-an ni Kulas sila Damaso ug Leonor nga nagbinayloay ug mga matam-is nga pasundayag sa gugma ubos sa punu-an sa kaktos.  Si Damaso bana sa iyang Tiya Lucing, si Leonor hinigugma ni Libron nga suod niyang higala.  Sila Leonor ug Libron kaslon na sa Valentine’s Day sa aydol niyang si Padre Isyut.  Kahinam ug kakulba ang gibati ni Kulas, wala na niya panumbalinga ang mga hulmigas nga diha na dapit sa iyang lukon-lukon. 

Human namapha nanglakaw dayon sila Damaso ug Leonor.  Ang kakutas ni Kulas napulihag kahadlok ug alindasay.  Pastilan, unsa man diay kadtong akong nakita!  Sagmuyo siyang nag-inusara naghuna-huna kon unsay dapat niya buhaton.

Sultihan ba niya ang iyang Tiya Lucing o adto ba hinuon niya ilad-lad ang tanan kang Libron?   Isugilon ba kini niya sa iyang Tatay o ngadto na lang ni Padre Isyut?  Nabalaka siya pag-ayo kon unsay mahitabo, naguol alang sa iyang amigo, naluoy sa iyang Tiya Lucing, nahadlok unsay iyang dangatan.   Magpakahilom ba ako o ako silang isumbong!

Children of God mao kini ang punto sentral sa wali ni Padre Joey sa misa sa alas singko sa hapon sa adlaw Biyernes petsa 6 ning bulan sa Enero.  "Kini mao ang akong Anak nga pinalangga; kaniya may kalipay ako” mao ang katapusang linya sa ebanghelyo nga nagsaysay sa kabunyagan ni Jesus.   Gihisgutan ni Padre Joey ang mga hiyas nga pagatamdan sa  mga anak sa Diyos -  pagka-mahiubsanon, pagtinabangay, pagbinayloay, pagpasayloay, ug uban pa.

Kitang tanan hinabulan ug tensyon sa pagpili – asa kita padulong, unsay atong buhaton, kinsay atong paminawon, asa kita dapig, asa kita sumbong, ug daghan pa.   Dili kita mga robot o mananap nga basta na lang magaw-ngan ug mahiktan.  Oo, bisan sa Iyang tinguha nga kita maluwas gayod, gihingpitan kita sa Diyos ug kagawasan sa pagpili. 

Nagpabiling walay imik si Kulas samtang gihasi siya sa iyang tanlag.  Unsay iyang buhaton, kinsay iyang palabihon?  Magpakabana siya o magpakahilom na lang?  Human sa pipila ka-adlaw nakahimo siyag desisyon ug gipili niya nga iyagyag ang iyang nakita.  Ug tingali tungod sa kabalaka gidetalya niya kini ngadto sa usa ka lay minister. 

Ang pagpili dili dautan dili usab maayo.  Katungod kini ug dili obligasyon.  Ang pagpili dili sala.  Ang sala matawo lamang sa punto kon aduna nay kalapasan sa mga gitugot ug gimbut-an. 

Ang kaulawan bisan unsa ka laksot, magdalag daghang mga gasa ilabi na sa mga nanilbihan sa Diyos.  Busa adunay takna sa pagpaningil ug panahon sa  pagkastigo.   Ang molutos dili ma-santos, ang mga santos dili manglutos.