KAPILYA SA INAHAN SA KANUNAYNG PANABANG, KACOM, WARD 4

Ang Altar

Kacom - 02/05/2011:  Nauna ang Nightwalker apan wala kini mogamot sa hunahuna sa mga tawo. Unya ang Sunflower apan didto hinuon kini moturok sa pikas tampi sa Sapa Kabungahan. Ug dayon ang Kagidlay Compound kon KACOM for short.

Lahi na ang KACOM karon kay sa kanhiay.  Wala na ang mga bungoton nga palibut ug ang nangligdas nga mga bato; mi-alegre ug nagma-uswagon na kini. Apan kon mag-pasiatab man ang KACOM karon dili kini pinaagi sa salapi ug bulawan, dili sa dungog o sa daghang kabalayan.  Kon dili ang maputing gapos sa pagtoo nga bisan pa man sa kapit-os ug kalaay sa kinabuhi, nagpabiling hugot diha sa landong sa Kapilya sa Inahan sa Kanunayng Panabang. Ang debosyon diha sa Kapilya gibana-bana nga mokapin nag 40 anyos. Nagsugod kini isip usa ka pag-debosyon sa miembro sa Familia de Castanares. Daghang bersyon ang sugilanon apan ang maseguro mao nga human kini mapasabwag ngadto sa mga silingang deboto sa panahon nila Norberto ug Milagros, ang Kapilya nahimong pirmanente na diha sa luna nga gihikling mismo ni Ginong Berting Castanares. Ug sukad niadto wala na kini mahisamag eskwater nga pasalin-salin sa mga dapit kon asa kini mahimong moturok.

Ang preparasyon sa taga Kacom

Sa mga katuigan, ang Kapilya naglarawan sa pag-suporta sa mga Castanares ilabi na panahon sa Piyesta diin adunay talagsaong pagsalu-salo inig kahuman gayod sa prosisyon sa Imahen sa Birhen. Dili usab ma-iwit ang pag-abiba sa mga taga KACOM, sa mga silingan nga lunod patay nga nagtampo sa mga kalihukan sa Kapilya. Gipanghinaot sa kanunay nga kining sadyang pagbinuligay magapadayon nga walay pagkabugto hangtud moturok pa ang binhi sa pagtoo. 

Ug ning adlawng Sabado, petsa 5 sa Pebrero tuig 2011 (2 bulan Rabi Al-Awaal tuig 1432) gipapanumpa atubangan sa hamiling parokyano sa KACOM ang mga napiling opisyal sa Kapilya nga maoy modumala niini sa tuig sa Konehong Metal aron mapatuman ang misyon sa Simbahan diha sa pagtukod sa Gagmayng Simbahanong Katilingban kon BEC. Ang mga napiling opisyales mao sila:

Presidente      -  Jerome Tan

Bise               -  Lyndon Castanares ug Bebot Papillero

Secretario      -  Bleben Tan

Tresorero       -  Jessica Vasquez

Auditor           -  Elizardo Selloria ug Marilyn Go

Mga Westy     -  Fely Canada, Rechel Vasquez, Kate Vasquez, Queenie Carreon, Zorobabel Abella, Janeth Aringay, Sonia Emoricha, Inday Emoricha, Geepee Papillero, ug Kelvin Tanghinan

Ang Pagkomulga

Usa ka mainit nga salu-salo ang gisaw-an human sa Santos nga Misa.  Ang nagpahigayon sa dekorasyon mao sila Wally Tan ug Kakay Laspuna.

Ang pag-asembol sa mga bobong gitampo-tampohan sa mga batan-on sa Kacom.

Ang mga Opisyales human sa panumpa uban ni Padre Oscar Ornopia