Angay bang badlongon ang dos anyos nga bata nga magsaba-saba sulod sa Simbahan sa panahon sa Misa? Angay gayod siyang pahilumon ug igawas sa Simbahan kon siya magmagahi man. Angay bang bunalan ang dos anyos nga bata nga mosuki ug magpakitag pagsukol human sa bisan unsa na lang nga mga paagi sa pagpakalma kaniya? Dapat lang siyang wiktan ug isunod dayon ang usa ka maamong pagkalinga.
Sala ba ang pagbunal sa atong mga anak? DILI - apan makalaboso kita tungod sa sugo sa dios nga gipalabi nila Kiko Pangilinan: Usa ka balaod sa tawo nga mibabag sa Kabubut-ong Diyosnon. Apan ang Buhing Diyos nga sukad wala pa gayod masayop sa iyang kagustuhan, mao gayoy modaog ug ang padayon nga di-pagsunod sa Iyang Kabubut-on mamunga pag liboan ka mga kasakit.
Ang pagdili sa pagpahamtang sa pisikal nga pag-disiplina (i.e. pagbunal) nagpugong sa Kagustuhan sa Diyos aron maumol diha sa panimalay ang usa ka anak nga matarong, masugtanon, ug mahadlokon Kaniya. Apan nagpabiling sala ang pag-abuso, pagdagmal, ug pagbun-og sa atong mga anak. Ang pagbunal maoy usa ka positibong pamaagi sa kalinga sa gugma ug nga kini dili nato pagabuhaton kon anaa kita sa kapungot, kalagot, ug kasuko kay moresulta gayud kini ngadto sa pagpamun-og. Ang tawo nga anaa sa kasuko nagapas-an na ug silot.
Ang Santos nga Bibliya maoy sagradong tinubdan sa Diyosnong pagtugot sa pag-disiplina pinaagi sa paghapos, pagwitik o pagbunal. Busa ang nagatoo nga ang pagbunal (spanking) makahatag ug kadaot sa bata nawad-an na ug pagsalig sa Diyos. ¨Ang kaalam sa tawo maoy binoang sa Diyos ..¨ ug ang mga panghitabo sa kalibutan karon nagamatuod nga nasayop ang mga eksperto. Walay paghunong ang mga balita sa patay, tulis, ug lugos – mga binuhatan sa mga batan-on nga nag edad ug dose anyos paubos. Ang hinungdan niini mao ang pagkawala sa pisikal nga aspeto sa pagdisiplina diha sa panimalay, sa eskuwelahan ug ang kakulang sa igong silot sa mga nakalapas sa balaod. Nawala sa tawo ang mithing makasantos tungod sa iyang pagsanong sa mga makabagong doktrina kontra-relihiyon.
Angay natong repasohon ang tanan ug magsugod kita niining pipila ka mga Santos Pulong sa Diyos. Isalikway ta ang giilang diyos sa atong mga magbabalaod aron malikay nato silang mga anak ta sa segurong kalaglagan.
Proverbs 13:18 Ang kawalad-on ug kaulaw modangat kaniya nga magadumili sa pagsaway; Apan kadtong manumbaling sa pagbadlong pagapasidunggan.
Proverbs 19:18 Castigoha ang imong anak, sa natan-aw mo nga aduna pay paglaum; Ug ayaw pag-ibutang ang imong kasingkasing sa iyang kalaglagan.
Colossians 3:20 Mga anak, magmasinugtanon kamo sa inyong mga ginikanan sa tanang mga butang, kay kini makapahimuot sa Ginoo.
Ephesians 6-2:3 "Tumahod ka sa imong amahan ug inahan" (kini mao ang nahaunang sugo nga may saad), aron magamauswagon ikaw ug mataas ang imong kinabuhi dinhi sa yuta."
Ephesians 6-2:3 "Tumahod ka sa imong amahan ug inahan" (kini mao ang nahaunang sugo nga may saad), aron magamauswagon ikaw ug mataas ang imong kinabuhi dinhi sa yuta."
Proverbs 22:6 Bansaya ang bata diha sa dalan nga iyang pagalaktan, Ug bisan kong siya matigulang na siya dili mobiya gikan niana.
Proverbs 23:13 Ayaw pagpugngi ang pagbadlong gikan sa bata; Kay kong imong hampakon siya sa bunal, siya dili mamatay.
Proverbs 23:14 Imong pagahampakon gayud siya uban sa bunal, Ug maluwas ang iyang kalag gikan sa Sheol (ang dapit sa kasakit).
Proverbs 22:15 Ang mga binuang nabugkos diha sa kasingkasing sa usa ka bata; Apan ang bunal sa pagbadlong magapalabog niana sa halayo gikan kaniya.
Proverbs 29:15 Ang bunal ug ang pagbadlong nagahatag ug kaalam; Apan ang usa ka bata nga pasagdan lamang sa iyang kaugalingon nagapakaulaw sa iyang inahan.
Proverbs 29:17 Sawaya ang imong anak, ug siya magahatag kanimo ug pahulay; Oo, siya magahatag ug kalipay sa imong kalag.
No comments:
Post a Comment