DUHA ANG REBOLTO SA SANTO ENTIERRO SA MINGLANILLA

Ang estorya sa Haya sa semana santa nagsalamin sa pagtoo ug pag-debosyon.  Sama kang Kristo Hesus nga taga-Galilea, ang Haya nga gikan sa Espanya gihangop sa katawhan sa Minglanilla uban sa tumang kalipay ug walay pagkabugtong pag-debosyon aron magpabiling buhi ang unang semana santa sa Herusalem.

Tungkopanon si Severina Resma, maanyag ug mahadlokon sa Diyos.  Naminyo siya ni Esteban Heruela ang taga Ilokos nga gidala sa Sugbo ug usa ka Kastilang Prayle.   Si Esteban ug Berina nahimong sandalan sa mga buot mosulod sa kinabuhing relihiyoso - bokasyon nga gisagop sa daghan nilang mga apo nga sila Sor Fructuosa ug Padre Ceferino Cana y Heruela, ang mga anak ni Tarsila; sila Sor Francisca ug Padre Atillano Heruela y Mantalaba, ang mga anak ni Severo;  ang apo nila Padre Atillano ug Perpetuo Heruela nga si Padre Julius Perpetuo y Jaca; ang apo ni Tarsila nga si Padre Dionesio Villordon y Cana; ug si Monsignor Felino J. Caballa, ig-agaw nila Sor Fructuosa ug Padre Cana.

Ang estorya sa ikaduhang rebolto sa Santo Entierro sa Minglanilla nagsugod diha ni  Sor Fructuosa kinsa milalin sa Espanya alang sa iyang walay pagkabugtong panaad, isip mongha, didto sa kombento sa Hijas de Caridad dela Immaculada Concepcion.   Sa wala pa ka-ordinahi ang iyang manghod, gipadala ni Sor Fructuosa ang ikaduhang El Santo Entierro del Cristo ang Haya sa prosisyon sa semana santa sa Minglanilla sukad niadtong tuig 1920 hangtud karon.  Gi-isip kining gasa-pasalamat alang ni Padre Ceferino.

Pagkamatay sa bana ni Tarsila nga si El Cabeza Lope Algabre Cana,  ang pagatiman sa ikaduhang  Haya  napunta ngadto sa ilang anak nga si Agatona ug gidumala sa iyang bana si Rosendo dela Calzada lapas katunga sa termino sa Kura Paroko nga si Padre Filomeno Silva (1905-1944) hangtud sa panahon ni Padre Narciso Maglasang (1945-1948).  Unya gikan ni Agatona ang pag-atiman sa ikaduhang  Haya  napunta ngadto sa manghod niyang si Andrea ang kapikas Francisco Villordon y Hernane,  igsuon ni Padre Anatolio ug sa El Presidente Resituto Villordon.

Sa tuig 1958, nahisgutan ang kabahin sa unang Sto. Entierro (unang Haya) nga maoy gigamit sa prosisyon sa Semana Santa gikan sa tuig 1857 hangtud 1919.  Gipangita kini ni Padre Dionesio alang sa iyang Parochia de Sto. Tomas de Villanaueva sa  Matutinao.  Ang unang Haya nga gitipigan sa magtiayong Rosendo ug Agatona tungod sa pagkatipak niini wala na makaplagi hangtud karon.  Gani ang kamanghorang anak ni Agatona nga si Zosimo dela Calzada walay bisan diyutay nga kasayuran niini

Gikan ni Andrea ang pag-atiman sa ikaduhang Haya napunta ngadto ni Badiday ug karon ubos na kini sa hinugpong nga pag-atiman sa mga apo ni Andrea ug ni Antonio Cana Villordon y Heruela, apo sa tuhod ni Severina Resma Heruela - kadtong maanyag nga Tungkopanon.