ANG MISTERIO SA KAPAIT

4/25/2013 – Sa pulong-pulong sa Team Pena-Selma gabii sa Ward 4, gihangyo si Jaime Caumeran ang mga nanambong pagbotar kaniya pagka-konsehal.  Malaomon siya nga matudlong sunod nga tsirman sa pundok sa mga kababaehan, PDWs, ug sa senior citizens. 

Gipadayag ni konsehal-to-be Jaime ang iyang kontra panan-aw sa pasalig sa Team Canada-Geonzon pagpagawas ug 1.2 milyones pesos nga pundong salapi sa mga programa sa senior citizens dinhi sa ato.

Tingali tungod sa akong napulo ka tuig nga kasinatian isip tesorero sa barangay ug sa lima usab ka tuig nga pagpamati sa bakho sa mga tigulang, gitab-angan ko sa emosyon nga iyang gipakita sa entablado sa kampanya.

Sa miaging semana, gipangutana ni Sam Rafaela sa Tunghaan ang GAD-tsirman nga si Konsehal Cording Mejias kabahin sa senior citizens badgeting sa Lungsod.  Diha sa maong tigum ang badget opiser nga si Mam Ara ug si Mam Lanie ang hepe sa DILG.

Kanhi presidente sa Federation of Farmers sa Guipos Pagadian si Pare Sam busa aduna siyay igong kasinatian sa relasyon ug  balaodon nga nagdugtong sa gobyerno ug mga NGOs sama sa Minglanilla Municipal Federation of Senior Citizens. 

Buot ni Sam makompirma ang gingi sa pagtagad ning Lungsod sa mga tigulang sa 19 ka-barangay diha sa bakikaw niini nga pag-serbisyo.  Apan bigo siya kay mao ra gihapon ang mga pamahayag - rewind sa nanglabayng katuigan.

From Konsehal Cording to Konsehal-to-Be Jaime

Junior citizen pa si Konsehal Cording ug  feeling differently gihapon si K2B Jaime bisan usa na siya ka senior citizen.  Mas bug-at gihapon alang kanila  ang dictum MAINSTREAMING, LACK OF FUNDS  o  NO FUNDS AVAILABLE  kaysa malimtanon ug nag-aginod na nga Senior Citizen.

Unsa man ang mga Priveleges nga gikan sa Lungsod?

Dili malalis nga duha kahigayon matag tuig, MANUG-AB sa kabusog ang mga tigulang gamit ang pundo sa Lungsod.  (Gawas niini, wala na!)

Pagbuot sa balaod nga sila dili magbayad sa ID card, sa Purchase Slip ug sa Purchase Booklet alang sa diskwento sa tambal, ug sa basic necessities ug prime commodities.

Ang akong pagsumada sa tanan mokabat lamang kinig P230,000.00, o "hinabang" nga P70 matag senior citizen nga buhi sulod usa ka tuig.  

Walay labot sa kwenta ang palibreng gatas-tsinelas-haplas ug reding glass nga gikan sa Kapitolyo, ingon man ang binulang pension nga tag P500 gikan sa gobierno nasyonal ngadto sa 34 o 36 ka buok tigulang sa Minglanilla.

Pahasukip

Ang Team Canada-Geonzon mipasalig nga sugdan nila ang usa ka seriosong pagtagad sa mga tigulang karong tuiga gayud!  Ang Team Pena-Selma nangangkon nga aduna usab silay ila sunod tuig 2014 gamit ang pormula:

                                        60 sorry || 77 okay  

Ug si kinsa man kanila ang modaog sa piniliay, hinaot nga walay usa sa grupo ang mahimong kahoy, bunal, langsang ug tunok sa Misterio sa Kapait sa mga Senior Citizens!  

Ward 4 – Hotspot sa Piniliay?

Motuo mog sa dili, pirming pildi si Mayor Selma sa Ward 4.  Sa panahon lamang ni Kap Berting nga una niyang natilawan ang katam-is sa kadaogan nga milanat hangtud sa piniliay 2010.

Sa wala pa manaog si Kap Berting sa pangatungdanan, iyang gihangyo ni Konsehal Ramon Tabora paglangsad aron mapadayon ang nasugdan na nga kalambuan sa barangay.   Bale usa ka adlaw niana panahon sa kampanya, gidala ni Kap Berting ang Grupo aron ipa-ila ug ikahimamat ang Mayor.

Apan pakyas sila bisan didto na ang tanan sa may pultang-bildo sa opisina sa Mayor.   Napugngan ang ilang tuyo kay gidid-an  man sila pagsulod sa opisina kay “busy ang Mayor.”   Apan daghan ang naka-saksi nga gabahis-balik daw bida sa entablado ang kandidato kinsa nangangkon nang daan layo pa ang piniliay nga siya maoy gipaloyohan sa Mayor ug suportado pa gayod sa Gobernador -  ang Kapitan karon nga si Antero Jun Cana.

Tungod sa iyang maamong buot, wala ikapakita ni Kap Berting ang mga senyales sa iyang kahiubos hangtud sa katapusang adlaw niya sa Barangay Hall.  Apan ang samang kasakit, gitipigan sa mga tawo nga nagsunod-budlay uban kaniya.

Ang piniliay sunod bulan kabahin sa tunok sa gidangatan sa pundok ni Kap Berting ug Ramon sa nahanawng paglaom sa mga taga Ward 4 nga magpadayon ang nasugdan na nga kalamboan.  Busa nunot sa panahon, molaganap ang kainit sa bugnong lugaynon nga mosulay  sa paguba karon sa Fortaleza Selma.

Magmalamposon kaha kining Team Selma-Pena karon paghakot sa mas daghang boto sa Ward 4?   Di ba kaha ning higayona, diha sa pagdumala ni Kap Jun Cana, maputol hinuon ang kinse ka tuig nga WINNING TREK ni Mayor Eddie sa Ward 4?    

(Usa ako sa pabor nga wagtangon na lang ang mga poster areas kay ang mga propaganda maghatag man ug ka-alegre sa piniliay.  Ato lang kining ipakuha unya sa mga kandidato) 

MGA PANAHON NGA INGON NIINI

SAYO SILANG NANGABOT ARON UNTA MAHMAMAT

4/12/13 - Nagkatapok karong adlawa ang mga senior citizens sa desi-nuybe ka barangay sa Minglanilla.  Hinuon ang ihap sa mga nanambong miabot lamang ug dosientos dies, ug kadaghanan kanila mga bag-ong salta sa Barangay Ubanon.

Alas dose imedya pa lang, aduna nay singkwenta ka mga senior citizens nga mi-ukopa sa mga lingkoranan didto sa Parish Multipurpose Hall , gikan sa Manduang, Guindarohan, Kampo 7 ug 8.  Sayo sila nga nangabot kay nasagap nila ang balita nga makig-himamat ang mga taga Team Selma-Pena kanila.  

ANG MGA KANDIDATO SA TEAM SELMA-PENA

Ang mga tigulang nanaglaom nga sa maong higayon mapa-abot nila ang kasagmuyo sa nagkaawop nga panan-aw sa namunu-an ning Lungsod kabahin sa uno porsientong gahing salapi alang sa mga taga Barangay Ubanon.  

Pagka-alas tres na sa hapon gidalit ang snaks nga tinapay nga walay palaman.    Luoy kaayo tan-awon ang mga tigulang nga naglisud usab  pagtulon sa pan tungod lagi kay wala man kini patabani bisag tubig man lang.

Alas-kuwatro na lang sa hapon apan walay mipatim-aw bisag anino na lang gikan sa Team Selma-Pena.   

Ug sa pag-abot na sa Sing Your Way Home time  diha na hibaloi sa mga Tigulang nga dili na diay moabot  ang Team Selma-Pena tungod sa kakulian nga wala tuyo-a (nga mao ang suroy-kampanya sa Team  didto sa Ward 4 ug 2) –   ug nga  sa sunod miting na lang sila makig-himamat kanila, petsa dies sa Mayo. 

Pangutana, asa man diay kutob ang panahon sa pagpa-ngampanya? 

Kon ingon na lang niini ang panahon kanunay, kawad-an na gayod ug gana ang mga Ubanon ug mahimo silang buta ug bungol usab sama sa mga taga-munisipyo nga nagmagahi hangtud karon sa paghatag sa benepisyo sa mga senior citizens sa Minglanilla.

KAPIN 20 KA MGA SENIOR CITIZENS ANG NAG-BIRTHDAY NING BULAN SA ABRIL

GIHATAGAN SILAG MGA GASA SA MGA KAUBAN NILANG MGA UBANON

DILI IKAG-LIMOD NGA KINING MGA NANAG-BIRTHDAY KARON NAGLAOM NGA ADUNA SILAY MAPAABOT GIKAN SA MUNISIPYO.

SI LOLO UWENG

“Wala na siya dinhi; kay siya nabanhaw, sumala sa iyang giingon.

 Umari kamo, tan-awa ninyo ang dapit nga iyang nahimutangan.”  (Matthew 28:6)

Kinsa kaninyo nga lumad taga-Minglanilla ang nakaila kang Lolo Uweng?  Sayon kaayo ang pag-ila ni Lolo Uwe o Uweng.  Ang gikinahanglan lamang mao ang kinatibuk-ang pagsabut sa mga terminong Santo Entierro, Santo Sepulcro, ug Haya.  Ang kahulugan niining tanan mao “Ang Pag-prosisyon sa Patayng Lawas ni Jesus Padulong sa Kalubngan.”  Ug kini mao Siya, ang milagrosong Lolo Uweng sa Simbahan sa Landayan, San Pedro, Laguna ang Shrine of Jesus in the Holy Sepulchre ( http://holysepulchreshrine.com/  )

Apan kay si Lolo Uweng gi-ukit man ug tawhanong mga kamot, nagkada-iya ang iyang hugis, panagway, ug kolor sa mga dapit diin siya gipasidungan ug gimahal.  Ug sa miaging Viernes Santo sa ato, akong ipa-ambit karon kining wala damhang hulagway-digital nga kuha sa usa ka ordinaryong 5-megapixel Sanyo Camera.

Hulagway kini sa Haya sa Minglanilla (o Lolo Uweng sa mga taga-Laguna) sa dihang gipahiluna Siya didto sa sala sa balay sa akong uyoan nga si Antonio Cana Villordon y Heruela sa Barangay Tunghaan.  Ang giusab ko lang niini  pina-agig usa ka digital-retouching mao ang kolor sa iyang nawong aron maduol sa kolor sa panit sa tawo.  Gipahimuslan ko usab ang pagamit sa natural nga kahayag gikan sa gawas sa balay.  Ug sayri nga ang ngalang Uwe o Uweng mao ang tradisyonal nga angga sa ngalang Emmanuel.

Usa ka hamubong sugilanon kabahin sa Haya sa Minglanilla mabasa sa:

http://tayaonglapis.blogspot.com/2011/05/duha-ang-rebolto-sa-santo-entierro-sa.html 

ADLAW-ADLAW NGA

PAG-DEBOSYON SA HAYA NI JESUS

Makagagahom ug mahigugmaong Jesus, patalinghugi kining akong pagsangpit kanimo bisan dili angay tungod sa kadaghan sa akong mga sala nga nabuhat.  Pasayloa intawon ako kay gibasolan ko na ang tanan nakong kalapasan nga nakapahimulag kanako sa bagong kinabuhi tungod sa kamatayon mo Cruz.

Himoa nga dili na ako mahimulag pa kanimo diha sa ma-kanunayong pagpalandong sa imong kamatayon ug sa paghigugma sa akong isig-kaingon sa adlawg tanan.

Sagradong Lawas ni Jesus, ipadangat nga mabatunan ko ang bunga sa imong pagpanubos gikan karon hangtud nga modangat ako sa Gingharian sa Amahan kinsa nagahari uban Kanimo ug sa Espiritu Santo, Dios nga  usa hangtud sa kahangturan.

Taposan pinaagi sa pag-ampo ug Amahan Namo, Maghimaya ka Maria, Gloria Patri ug Requiem.  Kining  pag-debosyon paga-ubanan usab sa  pagsimba ug pagkalawat sa adlawng tanan o matag adlawng Biernes. 


Idungag ang pag-ampo sa Litaniya sa Pasyon ni Jesus sa adlawng Biernes nga mahimong i-download (Latin o Englis) dinhi:  
http://www.preces-latinae.org/thesaurus/Filius/LitVitaePass.html

  

TEAM PATAY, TEAM BUHAY

Kausaban o Ipadayon ang Kausaban.  Mao kini ang sagad natong madungog panahon sa piniliay.  May kausaban ba sa mao gihapon o gikinahanglan na ang pag-ilis aron mapatuman ang maki-angayong kausaban?  Nakaayo ba  ang dynastiya kanato o nagdulot kinig endemikong kahiwian? 

Sa Mayo trese ning tuig, mahatagan na usab kitag kahigayonan pagpili sa mga tawong buot mosilbi o magpasilbi  kanato.  Libre kitang mopili, libre usab modawat kon adunay idunol.  Hinuon sayod na kita nga adunay kabayaran ang pagbaligya sa boto.

Magkalahi man ang atong sukdanan sa pagpili mahimong magkahiusa kita ug kawsa, sama pananglit sa hinaing sa mga Senior Citizens nga madawat na nila ang uno porsentong gahing salapi gikan sa panudlanan sa Lungsod nga karon moabot nag kapin 150-milyones pesos ang tuig.  

Apan mahimo na ba nga ihatag na kini kanila sa walay kabilingan?  Mahimo kaayo ug dugay na unta apan nagpabiling matig-a ang mga nanilbihan ning Lungsod.   Adunay duruha ka nawong ang mga antogon sa piniliay.  Ang nawong sa Hari sa usa ka bahin ug sa pikas ang sa Korona - ang  Team Buhay  ug  Team Patay  sa piniliay.

MGA BUTA UG BUNGOL UG WALAY KONSENSYA 

KONTRA-SENIOR CITIZENS

ANG MGA TAGA  TEAM PATAY

1.   Si Konsehal nga diha sa iyang pangatungdanan wala mohimog

 lakang aron ikahatag na ang 1% gahin sa mga Tigulang

2.  Si Konsehal nga hangtud karon mo-insister gihapon nga walay

igong  pundo ang Lungsod alang sa mga Senior Citizens

3. Si Konsehal nga mobabag sa tinguha sa kaubang Konsehal

paghatag  panabang sa mga Tigulang

4. Si Konsehal nga kusog mohatag apan nagpaka buta-bungol sa

kinatibuk-ang panginahanglan sa mga Senior Citizens

ADUNAY KONSENSYA

DAPIG-SENIOR CITIZENS

ANG MGA TAGA   TEAM BUHAY 

1.  Si Konsehal nga sa kanunay nagmahal sa mga Tigulang

sukad pa kaniadto hangtud karon

2.  Si Konsehal nga gihikawan ug katungod sa pagpakita sa iyang

katakos sa pagtabang sa katawhan

3.  Si Bagitong Pulitiko ug ang iyang buot buhaton nga naghatag

ug bag-ong paglaom sa mga Senior Citizens

P.S.:   Ang  Team Buhay dili lang para nila Lolo, Lola, Ingko, Insi

Tatay ug Nanay – para kini sa tanan nga gi-uhaw ug kausaban ug nga
gadulong na sa kasadpan

Tinuod nga dili nato maseguro ang umaabot, apan ang naseguro karon mao nga sa miaging unom ka tuig wala nila ikahatag ang bulawanong damgo sa PUNDOK UBANON.

MINGLANILLA, Domingo sa Bendita sa Lukay 2013

Mag alas kwatro na kadto sa hapon miabot ako sa Multipurpose Hall sa Parokya alang sa ensayo sa Live Via Crucis sa kasaulugan niini karong Martes Santo.  Kay layo pa man ang Ika-napulog usa ka estasyon nga angkon sa taga Zona 6, misuroy usa ako sa palibot ug kining mga mosunod misugat sa akong mga mata:

MINI-WATERFALL LAKE

 Mao Kini ang bag-ong talan-awon pagkasulod nato sa pultahan luyo sa Simbahan.  Dream-project kini ni Pader Hernani Bercede, ang gardener-landscaper sa parokya.  Usa ka mini-waterfalls diin ang tubig nakahimog danawan.   

PLAZA DE SAN PEDRO CALUNGSOD

 Dili ko segurado kon si kinsa kanila ang nagdamgo niining maanindot nga Plaza de San Pedro Calungsod. Apan kining mini-plaza mitumaw sa may luna nga giugmad usab ni Pader Nani.

s

tBENDITA SA MGA LUKAY MISA SA ALAS 4

Pagkalahi na gayud sa paagi paghandum sa Domingo de Ramos o Linggo ng Palaspas, nga mao ang Domingo sa bendita sa lukay.  Kaniadto mga palwa sa lubi ang sagad natong makita sulod ug gawas sa Simbahan.  Dayon paga-uyogon kini inig sabwag na sa agua bendita.  Karon dili na hapit makit-an pa ang mga lukay-lubi kay halos tanang mga kalubihan gihimo nag sub-divisions.  Ang mga lukay-palma karon dili na usab paga-uyogon inig sabwag na sa holy water, timaan niadtong madaogong adlaw pagsulod ni Jesus sa Herusalem diha sa singgit sa kalipay ug wagayway sa mga palmas.

LARAWAN SA IKA-13 KA ESTASYON

May respito ako sa mga pintor ug mga tagaguhit.  Apan kining larawan sa ika-napulog tulo ka estasyon dili angay i-apil sa debosyon sa via crucis.  Para kanako usa kini ka misrepresentation, kay sa dihang gipahiluna na si Jesus sa lubnganan nga kinubkob sa kilid sa usa ka pangpang, giputos na ang iyang lawas ug panaptong lino (sumala sa asoy nila San Lucas, San Mateo ug San Marcus) uban ang mga pahumot dugang pa ni San Juan. 

Mao kini ang eksena diin nakigsulti si Jesus sa mga inahan sa Jerusalem nga nagasunod kaniya paingon sa Golgotha.  Ang pasadula sa pasyon ug via crucis pagahimoon karong Martes Santo gikan sa Simbahan paingon hangtud sa Vito Ugoy.  Ang pasadula magsugod sayo sa alas kwatro sa kaadlawon sa Marso 26.  Tambungan ta kini isip halad-handum sa kasakit ni Jesus.

Daghan ang nanimbahay sa misa sa alas kwatro ug alas singko sa hapon.  Silang tanan namauli bitbit ang paglaom nga nakatuman na sila sa ilang katungdanan sa pagsimba diha sa espesyal nga paghandum sa Dominica in Palmis de Passione Domini. 

MINGLANILLA SENIOR CITIZENS: Mayoriyang Pinasagdan

Panahon karon sa piniliay ug importante sa usa ka kandidato ang tanan niyang pagahimuon bisan gani pag-likay sa iro sa dalan padulong sa nagkatapok nga mga senior citizens.

Ang Hugpong Senior Citizens sa Minglanilla mokabat na karon hangtud lima ka libo.   Ug dinuyogan sa mga anak, umagad, ug apo seguradong modoble kini inig-ihap na sa mga boto sa makina-Picos.

Matud pa ni Konsehal (name withheld) pasagdahan na lang nato ang mga Senior Citizens kay malimtanon na na sila.  Ang buot niya ipasabot nga ang mga tigulang mahimong hinumduman lamang panahon sa piniliay kay dali ra kaayo silang mahaylo diha sa mga pa-premyo ug pangako.

Ang Lungsod sa Minglanilla nagdawat karon sa pinaka-dakong bahin sa pundo gikan sa Rentas Internas.  Gani sa tuig 2012 mikabat kinig kapin-kulang P107-milyon ka pesos.

Sa Oktubre matag tuig ang mga tigulang magtapok aron pagsaulog sa Senior Citizens Week ug sa Disyembre alang sa Kasaulogan sa Pasko.  Ang badget sa matag okasyon mokabat lang ug tag P140 matag senior nga makatambong apan taman lang sa sies sientos ka ulo. 

Gani ang pagpang-apod-apod sa libre nga Senior Citizen Purchase Booklets aron maka-diskwento sa matag palit ug bugas, karne, gatas, kamay, pan, asin, gamit personal, bateriya, lansang, bombilya, lawog sa mga mananap, ug uban pa naputol ug naundang gayod kaniadto pang bulan sa Agosto 2012.

Sa matag karon ug unya ang mga Senior Citizens manglugsong sa Lungsod uban ang pamasin nga aduna silay mabitbit pagbalik o makaapil ba hinuon sa mga serbisyong walay klaro.

Hapit na ang eleksyon sa Mayo ug panahon karon sa pag-ugkat sa mga saad ug paghimog mga bagong panaad.  May kausaban ba sa mao gihapon o gikinahanglan na silang hinginlan, 6 o 8 ba kanila kon dili silang tanan!?

BACOLOD - DEAD OR ALIVE

Lingaw kaayo ko nga namati-tanaw sa mga balita karon sa radyo ug television ang kabahin sa nahitabo didto sa Bacolod diin ang taga-Simbahan ug pipila sa mga parokyano nagmugna ug makalingaw nga gahob-pulitikanhon.

Maayo man o dili kini, nasubay o nasukwahi man sa balaod, alang kanako usa lamang kini sa mga binag-ong pama-aging gawasnon matag panahon sa Piniliay nga nagagikan dili sa hanay sa mga mokandidato kon dili sa mga pumipili.  Usa lamang kini ka GIMIK nga mahimong makadaot ug makatabang sa mga kandidato ug sa mga moboto – normal nga mahitabo sa matag eleksyon.

Sigun sa makita diha sa mga malahiganteng tarpulina nga gipaskil mismo sa bongbong-bata sa Catedral de San Sebastian de Bacolod, adunay pito ka kandidato sa Hugpong Patay sila:

Risa Hontiveros-Baraquel

Juan Edgardo Angara

Alan Peter Cayetano

Francis Escudero

Loren Legarda

Teddy Casiño

Jack Enrile

Partylist

BBaBayanGabriela

Akbayan

Bayan Muna

Anak Pawis

Unom ang sa Hugpong Buhi, sila:

 Antonio Trillanes

Gregorio Honasan

Joseph Victor Ejercito-Estrada

Mitos Magsaysay

Koko Pimentel

Cynthia Villar

Partylist

Ang Pamilya

Buhay

Ang ilang pagka-patay ug pagkabuhi, miugat sa ilang pag-uyon o pag-supak sa balaodnon kabahin sa RH Bill.  

ANG DE-GURA NGA GIPANG-APOD-APOD 

Buhi man o Patay, ang segurado mao kini:

BUHI ang Kandidato

PATAY ang Moboto.

WARD 4 SENIOR’S VALENTINE SPECIAL

Roll Call by Gerard Negapatan

It’s “Never Too Late”, mao kini ang gipakita sa Ward 4 senior citizens karong adlawa gikan alas singko sa hapon hangtud alas nueve sa gabii.

“Bisag magkapyot basta makasakay, bisag ma-iwit basta makagunit” -   Senior Citizens of Ward 4 celebrated Valentine’s Day late but never lacking the spirit of unity.

Susing, Lita & sisters, Lucing & Bebeng A

Sa maong halad (party) naka-apil gayud ang dugay na kaayong gihandom nga mga silinganan sila Rene Reroma, Lauro Getuaban, ug Pacita Cimafranca.  Gipangumusta usab ang mga kaigsuonan ni Lolit Cabaluna sila Juliana Sellote 86yo, Concepcion dela Pena 75yo ug Leonora Aduna 69yo ug ang grupo nila Terry Canete, Neddy Larrobis, ug Sima-Lando Erediano.

Lauro, Sima-Lando, Pacita, Lolit Japan,
ug Rene Reroma

Neddy, Terry, Fely, ug BB 

Diha ang naandang mga games nga nagdalag pa-premyo ug give aways samag pinutos bugas-humay, pitaka, tee-shirts, paypay ug uban pa.  Adunay pa-kontes sa kanta walay duyog ug ballroom dancing.

Celing B, Talina-Pino, ug Alo La Rosa

Fely, Marilyn, Mam Boco, Ceding,
Gloria, ug Minda

Ang panaghiusa ug ang pagbati sa usag-usa gipamatuod diha sa mga baong B.Y.O.P. nga gisaluhan sa tanan.  Hinuon ang maong halad (party) dili sama ka-bongga sa kasaulogan sa Pasko diin adunay mas-daghang mga pa-premyo ug give aways samag payong ug bring home package nga 2kg. bugas-humay matag usa.

Ang group action song “Balay ni Superman”, maoy pinaka-paborito sa grupo.

Bebeng G, Cita, Warnie, Lards, ug Celing

BARANGAY TUNGKIL NAG-ELEKSYON

Peb. 24, 2013 – Sayo sa buntag karong adlawa nagkatapok ang mga seniors didto sa Balay Barangay aron sa pagpili ug mga opisyales nga maoy modala sa grupo sa senior citizens sa Barangay Tungkil.

Bisan wala makatambong ang guwapong Kapitan ug ABC President nga si Manolo Delgado nagmalamposon ang maong panagtigom ug nga napili kining mga mosunod:

Pre-election lecture

Tungkil Senior Citizens Chapter 

President      -Rose Barrameda
VPresident   - Berting Arciaga
Secretary     -Ms. Avenido
Treasurer    -Norma Pugoy
Auditors       -Mario Parba

  - Pacheco Ygana

BOD/ Purok PROs
                    -Jaime Coyoca
                    -Remedios Malingin
                    -Pilar Adlawan
                    -Myrna Yuson
                    -Susana Adlawan

Gina-ingon nga sa pagka-porma niining kapunungan kahatagan na gayod ug igong pagtagad ang mga senior citizens sa Tungkil nga usa na karon ka malamboong Barangay.

Ang maong piniliay gisaksihan sa Public Relations Officer sa Minglanilla Municipal Federation of Senior Citizens Association.

TIGIDIG TIGIDIG WARD 4

Tulo ang nagsambunot pagka-Kapitan sa Ward 4 sa piniliay sa 1997 – usa sa administrasyon ug duha sa oposisyon/independent.  Ug ang midaog mao ang taga-oposisyon nga si Kap Berting Villasencio.

Gihimo ni Kap Berting ang tanan aron mobaha ang mga mehoras sa Ward 4 gikan sa mga batikang politico sa administrasyong Selma-Garcia-Gullas.  Ug sa piniliay sa 1998 midaog gayod si Mayor Eddie Selma sa Barangay Ward 4, sa unang higayon.  Maingon nato nga kini tungod sa pag-suporta ni Kap Berting kaniya ug sa mga miembro sa iyang pundok.

Hangtud karon nagpabiling humot si Mayor Selma sa Ward 4 nga usa ka oposisyon barangay.  Sa gidugayon nga katorse ka tuig namunga ang maayong relasyon sa Ward 4 sa Administrasyong Selma diha sa mga dili hitupngan nga mga proyekto sama sa Barangay Hall Building, Day Care Center Building, Health Center ug Tanod Headquarters Building, usa ka magarang konkretong-tulay, usa ka konkretong foot bridge, dike o konkretong pagdipensa sa tubig-baha, donated barangay roads ug ang pagsemento parsyal niini, luna alang sa plaza sa Barangay, ug mga programa alang sa kabataan, kababaehan, hamtong, ug sa mga programa sa gobierno sama sa botika sa barangay, bugasan, ug child care.

Napakgang lamang ang kagugihan ni Kap Berting pagkapopos sa iyang termino sa tuig 2010.  Mibiya siya nga nagdawat lamang ug pahinungod nga P4,898.00 matag bulan usa sa mga lowest honorarium earned sa usa ka barangay kapitan ning Lungsod.  HINONO-A wala niya biyai nga samag iro ang mga taga Barangay ug mga kaubanan niya sa pagpalambo niini.

Gisuportahan ni Eks-Kap Berting ang usa ka grupo aron mapadayon ang kalamboan nga nasugdan na.  Ug ang kandidato pagka-sunod kapitan mao unta si Ramon Tabora.  Inila si Ramon nga usa ka maayong tawo ug walay bisyo nga makapatay sa kalag.  Ang iyang gikaatbang mao ang usa ka tawo nga antigo sa negosyo politikal - si Antero Jun Cana.   Ang suporta nga gihatag ni Berting sa grupo ni Ramon Tabora dili ordinaryong pagsuporta lamang.  Iyang gihatag ang tibuok niyang kasing-kasing ug kalag kay sayod man siya daan nga ang dalan nga iyang gitahak sa pagka-kapitan mao ra usab ang dalan nga pagasubayon ni Ramon ug mga kaubanan.

Apan wala makuha sa grupo ni Kap Berting ang bendisyon sa Administrasyong Selma sa 2010 kay didto man kini sila mopabor ug nag-ambahan sa kalinga sa usa ka tawo nga haduol kuno sa kasingkasing sa mga taga-administrasyong lokal ug probinsyal.  Nahimo kining tunok-suha sa mga tawo nga naningkamot ug nanaglaom nga si Mayor Eddie usa ka matinumanong amahan.  Sa maong piniliay, nahimong daw-oposisyon ang grupo apan padayon sa gihapon ang pagsuporta niini sa Administrayong Selma.

Usa ka adlaw niana sa nagsingabot pa ang piniliay sayo nga nangandam ang grupo ni Kap Berting aron ikahimamat ang Amahan sa Lungsod ug ipa-ila kaniya ang grupo nga sa dugayng panahon nagsuporta mismo kaniya.  Apan – dili man tingali gayod gikan sa Mayor – gidid-an sila, gipahulat ug dugay, gi-ayran ug wala gayod makaabot sa pultahang bildo sa ofisina sa Mayor.  Apan nasaksihan sa grupo ang mala-artistang pagsulod-gawas ni Antero Jun sa ofisina sa Mayor.

Napildi si Ramon sa maong piniliay apan lusot ang mayoriya sa iyang mga konsehal.  Midaog usab si Mayor Eddie sa Ward 4 uban ang hapit tanan sa iyang grupo.

Karong Mayo 2013 si Mayor Eddie dili lamang magpapili isip usa ka konsehal, bitbit niya ang iyang pinalangang anak nga si Konsehal Jojo, ang Administration Candidate pagka-Bise Mayor.

Kalmado pa ang Bulkan Ward 4 sa pagkakaron apan aduna nay mga madungog nga mga pagdahunog sa kagahapon.  Sa akong pag-estima dili na interesado si eks-Kap Berting nga mangatungdanan pa sa Barangay.   Tungod kini sa nagkahamtong niyang panglawas apan posibli usab nga kini tungod sa nakatagong kasakit ug kahiubos. 

Busa anaa karon sa mga kamot ug abilidad ni Kap Antero Cana ang pagpadayon sa SELMA MAGIC sa Ward 4.

Unsa na man karon ang kahimtang sa Ward 4?  May kalamboan ba o kalibugan?  Mapagawas ba kaha ni Kap Jun ang SELMA MAGIC sa Mayo 2013?  Mahatag ba kaha kini niya agig pasalamat sa mga kaayohan kon aduna man nga nadawat sa mga taga-Ward 4 sa miaging tulo ka tuig sa iyang pagka-Kapitan?

Ang buhay ay weder weder lang, at ang weder ay buhay-buhay din.

TAGNA O TSAMBA

Sa Disyembre sa miaging tuig nagsulat akog lyriko nga gipahaom-buhi sa orihinalng awit ni Yoyoy Villame.  Ania ang pipila ka linya sa maong gipahaom nga awit:

WARD 4 KRISMAS TREE

(tuno:  "Nabali ang Christmas Tree")

Pagdungo jud sa BAPOR

Milahos kamis Ward 4

Uban mga siLINGAN

Naghimo kamig Krismas TREE

Taas ang among Krismas TREE

Pipten pet daw hiGANTE

Daghan ang mga SUGA

May pula, asul, ug BERDE

**Unya dayon may mikatkat

Sila Bleben ug Koree

Ita-od nila ang estar

Sa tumoy sa Krismas tree

(for the complete song follow this link: 

http://tayaonglapis.blogspot.com/2011/12/lungsod-sa-minglanilla-ward-4.html

Panagna

Ang akong nabuhat nahisamag usa ka panagna kay ning tuig 2012 bulan sa Disyembre, Natawo gayud ang maong KrismasTree.  Wala ko magdahom nga kining Krismas Tree mousbong mismo sa dapit diin una nakong nahunahuna ang lyriko sa maong awit sa tuig nga milabay 2011.  Kahibulongan dili ba?

Natuman

Krismas Tree sa Sitio Fatima

Ang katumanan mao kining Krismas Tree nga makita sa PYO basketbol kort Sitio Sunflower Ward 4 ning Lungsod nga nagsimbolo sa panaghiusa ug pagsinabtanay sa manag-silingan.  

Laing Katumanan

Krismas Tree sa Barangay

Ang tanghaga wala matapos sa PYO basketbol kort ug mipadayon kini latas-labang sa kanhi basketbol kort atubangan-ligas sa Ward 4 Barangay Hall. Niining tuiga ang mga opisyal sa Barangay Ward 4 nagmug-na ug mala-higanteng Krismas Tree pipila ka metros lamang gikan sa SunflowserTree sa karaan nga Barangay Basketbol Kort.  Hinuon ang basketbol kort karon gihimo na nga usa ka Plaza sa Barangay sa administrasyon Cana bisan libon ug hilan pa ang maong dapit.

Tagna o Tsamba

Kon kining duruha ka katumanan usa ka majik sa pasko, o imbento-personal, lamang, kamo na lang ang mopahigayon sa inyong mga kabubut-on.

Meri Krismas, Hapi New Yer

Kon pananglit dili jud kapugngan nga adunay molutaw nga komentaryo niining duruha ka managsilingang Krismas Tree, iluom na lamang kini uban sa inyong silingan.  Apan baya kay panahon sa Pasko karon isalikway nato ang pag-panaway ug pagbiay-biay - ang mga Satanas sa nagkapiyo-os nga kabubut-on.

(P.S.  Ang Krismas Tree sa sitio Sunflower mao ang gipadayon nga tradisyon sa Pasko diin sa nanglabay nga mga katuigan aduna gayoy Paskohanong simbolo nga makita diha sa maong dapit sama niadtong Ward 4 Stars sa tuig 2009 ug tuig 2010 ug ang Pasungan sa tuig 2011.)