TUNGOD SA WARD 2 ANG WARD 4 GIHULGA SA SAPA KABUNGAHAN

Hulyo 16, 2012.   Opisyal man siya  sa Barangay o dili, natino na ang kamatuoran nga ang gi-aling iron mesh sa taga-Munisipyo diha sa Sapa Kabungahan dapit sa may Ward 4, atbang sa St. Cecilia’s gitukod pabor sa Ward 2 aron kapanalipdan ang maong Barangay sa tubig nga moawas sa mga kabalayan ug sa mga anod ug gapnod nga mobara sa mga imburnal didto ilabi na sa may SPRINGWOODS.

Sa pagkakita gayod sa maong tawo (si Manong A-?) sa kahimtang karon sa puthaw nga estruktura (human sa dakong pagbaha 7 kaadlaw na ang milabay), siya miingon dayon nga gikinahanglang patubo-an pa ang gitas-on sa corrugated iron mesh kay hapit na kini matabuni sa mga dinahiling bato ug balas.

APAN SAYOD ANG TANAN nga tungod sa maong estruktura namiligro ang kabtangan ug kinabuhi sa mga taga-Ward 4 ug KARONG BAG-O nahimong delikado na kini sa maayong panglawas ilabi na sa mga kabataan.

SAYOD ANG TANAN, nga ang pasalig nga paga-limpiyohan ang gi-aling puthaw matag karon ug unya aron malikayan ang pagkabara sa tubig ug pagtubo sa Sapa usa ka dakong  BAKAK.

APAN NGANONG DIHA MAN GIBUTANG SA HURISDIKSYON SA BRGY. WARD 4 ANG ESTRUKTURA UG DILI MAN SA DAPIT LABANG NA SA NATIONAL HIGHWAY NGA HURISDIKSYON MISMO SA BRGY. WARD 2 ARON MAATIMAN KINI SA BARANGAY?  DILI BA USA KINI KA PAGPASIPALA UG PAGPANLUPIG?

Ug kining tanan gipadayag niining mga mosunod nga mga hulagway.

Ang kahimtang sa Ali sa miaging bulan.  Makita nga napugngan niini ang  mga anod  apan nakahimo usab kinig halawom nga linaw diha sa gi-ambakan sa tubig.

Ika-2 semana sa Hulyo 2012 , makita nga lubog na kaayo (baho pa) ang tubig nga dili na makadaloy padulong sa ubos kong walay makusog nga pag-ulan.  Makita usab ang pagtubo sa Sapa kay nagsilbi man nga usa ka diki ang estruktura nga sukad wala pa gayod kalimpiyohi.

Ingon niini katindi ang mga anod ug gapnod nga nagkatipun-og  kay napugngan man sa maong aling puthaw.  Makita dinhi ang mahugaw nga tubig sa ubos nga nagagikan sa linaw.

Klos-up sa nagkalawom, baho,  ug hugaw nga linaw.  Nahimo na kini karon nga usa ka itloganan sa lamok.