THE HOLY FACE

Halos magkapareho ang Arabic nga akhirah ug ang Italianong acheropita.   Ang naulahi nagkahulugag dili mugna tawhanon, ang naguna kinabuhing walay katapusan.   Ang bukot sa Turin (Shroud of Turin) ug ang   Veronica sa Manopello (Veil of Manopello) giila nga mga acheropita.   Ug agig pamalandong sa semana santa, hisgutan nato kadtong usa ka pagtuon sa mga eksperto sa Tri-Dimensional Computerized Imaging   nga gipahigayon didto sa Polandia ug Italia kabahin sa duruha ka mga acheropita.

Ang nawong nga napatik sa belo sa Manopello maoy tradisyonal nga paglarawan sa nawong ni Kristo – bungoton, taas ang buhok, buka ang duha ka mata, medyo ablig gamay ang baba, ug may pagka-hiwi ang ilong.     Namatud-an sa maong pagtuon nga ang Veronica ug ang bukot-Turin  magka-pareho sa daghang aspeto ilabi na ang pagkahaom sa duha ka nawong kon iakob kini.

Nakita usab ang pagkatakdo sa agi sa mga samad.  Ug sa pisiko- kemikal nga pagtino, nahibaloan nga ang mga larawan naporma sa dili managsamang higayon.  Apan ang makapa-igking sa tanan mao nga ang napatik nga mga dagway nagagikan sa usa ka tawo nga gipaantos ug gidagmalan diha sa kamatayon.   Ang pagtoo nga kining duruha ka acheropita naglarawan sa Sagradong Dagway ni Hesus nasabwag na sa kalibutan diha sa adlaw-adlaw nga pagbisita ug pag-debosyon sa mga larawan dinasonan sa mga relihiyoso ug sa Santo Papa sa Roma.

Si Hesus miingon:  Wala pa gayuy tawo nga nakakita sa Dios (Huwan 1:18).  Ang mga sagradong larawan ni Kristo nga miabot sa atong panahon karon bunga lamang  sa imahinasyon sa mga maestro nga nagdibuho niini.

 

Kinabuhi sa mga Pagano ang pagsimba atubangan sa mga diyos-diyos, sa mga estatuwang binuhat sa tawo.  Naglisud sila pagpahiluna sa ilang kaugalingon diha sa pagsimba sa Diyos nga dili makita.  Agig pagpahigayon sa gimbuhaton sa pagampo, gitugotan sa Simbahan ang pagamit ug mga imahen,  estatuwa, ug uban pang butang nga maoy mo-representar sa tinuoray nga giampoan.  Ug kining pagtugot nagpabiling wala malibkas hangtud karon.  Unsa ka importante kining duruha ka mga acheropita?

Nagkadaiya ang mga larawan sa nawong ni Hesus sa Simbahan, sa tindahan, ug sa atong panimalay.   Adunay imahen nga singkit ug mga mata, super-kulot ang buhok, daw-periko ang ilong, bukad ang mga ngabil, lubid-lambo ang buhok, ug super-pogi usab.  Ang pagmugna ug usa ka panagway sa Anak sa Diyos (standard image of Christ)  pinasikad sa bukot-Turin ug sa belo sa Manopello makamugnag bag-ong kalibutanong pagtoo, pagpakabana ug panagdait.  Ang pagsimba sa matuod nga nawong ni Kristo, makahatag kanatog kaisog pagpugong sa atong kaugalingon, paglikay sa makadaot sa lawas ug kalag, ug paghingpit sa atong pagtoo sa Diyos nga Usa.  Kay ang adlaw-adlaw nga pakig-atubang Kaniya magmugna  ug usa ka personal nga relasyon nga mopagaan sa tawhanong paningkamot ilabi na sa panahon sa panginahanglan, sa mga butang nga daw lisud kabuton.