SA PAYAG NI JUAN

Yano ug malinawong pagpuyo ang nasinati ko sa payag ni Juan-Benig, mga ginikanan sa akong Lolo Paking og Lola Manding Andrea.  Didto kini natarok atbang sa sakristiya sa simbahan sa Putli nga Kasingkasing ni Maria, ning lungsod.  Ug kay ako man ang unang apo ni Andrea-Paking, nakapuyo ako sa Payag ni Juan hangtud ikaduhang ang-ang sa elementarya sa Poblacion Central School.

Ako ug ang akong Lola Diyang atubangan
sa Payag ni Juan-higante.  Hulagway
kuha ni Atty. Vicente Villordon

Bisag semana Santa, dama ko ang katugnaw sa kagabhion didto sa Payag ni Juan lay lagi lusot-kilusot man ang hangin sa bongbong- amakan ug salog-kawayan niini.  Walay radyo ug walay nanag-iyag telebisyon sa palibot ug gikinahanglan pang moadto sa tindahan ni Lauro-Pesit aron mamati sa mga balita ug masundan ang radyo- dramang KORAK – ANG HARI SA KALASANGAN.  Bibo ug malipayon kaming mga bata nga manabanog, magdulag jolen, lastiko, luthang, bagul, jackstone, sibog-sibog, sabong apan-apan, kawboy-indian, slayd-palwa, duyan, jam-d-spayn, layog, satong, biko-biko, pensing, lumba dagan, tago-tago, tubig-tubig, ug kalikot sa mga mananap, baboy, iring, itoy, ug ako sa unggoy nga gihigot sa lubi atubangan gayod sa Payag ni Juan.

Laing naghatag ug kaalegre sa Lungsod mao ang mga cine-vans sa Coca-cola, Pepsi, PRC, PMC, ug uban pa nga mopasalidang libreng sine sa may Plaza Maria.

Sa gidugayon sa akong pagpuyo sa Payag ni Juan kining mga mosunod maoy dili nako hikalimtan:

1.     Puto sikwate sa tindahan ni Pilo-Goring sa eskina,  Lope

Cana St. ug National Highway, kilid sa La Nueva karon

2.    Ang akong paboritong tubig-kamay, anibal ug bugon

3.    Ang agonias sa alas sayis sa hapon

4.    Ang mga kalabera sa karaang kampanaryo dapit sa may IHMA kilid-atbang sa simbahan

5.    Ang pag-ka jr. acolyte nako panahon ni Padre Tomas Villamor ug  kahumot sa ensenso sa Benedecion

6.    Ang akong pagka-anghel sa Sugat ubos ni Maestro Kianong Bas

7.    Pagkaon sa masunog nga hostiyas kon magluto na si Papa Paking niini para sa santos nga misa

8.    Ang hardin ni Noy Sendoy (bana ni Manang Tuna nga igsuon ni Lola Diyang) ang akong refugium peccatorum kon magligoy ako sa klase ni Mam Agas ug

9.    Ang naguba nga gloriosong Carro de Sto. Entierro nga una kong nakita duol sa Payag ni Juan

Ug kon aduna pa may mas-alegre og mas-haruhay nga payag sa akong pagkabata, palabihon ko sa gihapon nga puy-an pagusab ang Payag ni Juan-higante kay didto ako malipayon ug hinabulag bulaw.

(Related stories in this Blog:   LOLO UWENG  ug   DUHA ANG REBOLTO SA STO.
ENTIERRO SA MINGLANILLA)

ESTORBOT SA SUGAT-KABANHAWAN

Daghang mga isyu nga mitumaw karon kabahin sa Sugat-Kabanhawan sa  Minglanilla, Sugbo ang sugat capital sa Pilipinas kono.  Pipila niini mao ang mahitungod sa Agila, sa Disco, sa duwelo nila Arkangheles Lucifer ug Gabriel, ug ang pagpasakit sa mga ginikanan, kabata-an ug mga magtutudlo pina-agi sa sayaw kompetisyon sa mga eskuwelahan tungod sa mala-Sinulog nga gahin gikan P250,000 hangtud P650,000 kada hayskul!

Hinuon dili nato hisgutan kining tanan karon.

Unsa Man Diay ang Kahulugan sa Agila sa Sugat?

Wala.  Wala gayud gawas nga usa kini ka dayan-dayan samag bakdrop sa entablado nga gidesenyog hugis langgam-Agila.

Kaniadto ang mga deboto gikan sa lain-laing dapit sa Sugbo moanhi gayud sa Minglanilla aron mokuyog sa procession ug motan-aw sa pagsugat sa imahen sa Mahal nga Birhen Maria ug sa Nabanhawng Hesus.

Magpalandong sila samtang gibusog nila ang ilang mga mata sa mga talan-awon sama sa Sugatan, sa mga Angel ilabi na sa Anghel nga motangtang sa Kapa sa Kasakit, sa luthang ug sa nagbitay nga Hudas, sa huni sa mga musikero, ug sa awit regina sililitares.

Wala gayod ni usa kanila nga naghunahuna nga ang Agila kaanib si Satanas , nga ang Agila kaanib si Lucifer ang kampeon sa kangitngit nga mitaral sa mga anghel sa lupon ni Gabriel aron maseguro ang kadaogan sa mga nagrebeldeng puwersa.

Apan nganong nahimo man kining estoryang botbot?  Nganong nanglusot man ang mga ikog sa kangitngit nga nagpakatap sa estorbot nga si Lucifer-Agila ug si Gabriel nagduwelo hangtud sa kamatayon sa Pasko sa Pagkabanhaw?  Ug sa dihang midaog  si Gabriel ug naparot si Lucifer-Agila,  nangula dayon ang mga naprisong mga anghel gawas sa bilahan sa Agila sa Sugat.

MAO KINI ANG LABING DAKONG BINUANG UG BOTBOT SA SUGAT-KABANHAWAN sa Minglanilla sa panahon nato karon.  Estorbot nga gisakyan ug gi-abyan sa mga dili taga-Minglanilla.  Ug ang nagpaka-aron ingnon nga maalamon sa estorbot, sa Agila ug sa Sugat nga mga taga-Minglanilla, kini sila mao ang mga koko ug sungo sa Agilang nahimong yawan-on na intawon.  Sayon ra unta sabton nga ang Agila usa lamang ka tipik sa estorya sa sugat, usa ka adornong papel sa Sugatan nga sa dugayng panahon nagdani sa mga tinuoray nga mga katoliko. 

UNYA KARONG TUIGA 2014 nadungog kining mga tuaw nga hunahunaon na lang nato nga ang Agila mao ang espiritu santo; nga ilisan na lang kaha nato ang Agila sa hugis Salampati; nga e-desenyo ang ulo sa Agila ngadto sa ulo sa Salampati (Agipati?); nga ibalik na lang nato ang sugat sa iyang karaang nataran.

PLEASE LANG, KON WALA KAMOY LAING MAHIMO PA SA MINGLANILLA, AYAW NA INTAWON UG DUNGAGI PA ANG KALABAD SA AMONG MGA ULO. OKAY NA SEGURO NGA MAGPADAYON KINING MINI NGA DUWELO, ANG PAGHUNONG SA DISCO, UG PAGHALAD SA SANTOS NGA MISA DIDTO MISMO SA SPORTS COMPLEX.   HINONOA MAAYO UNTAG SABTON SA ATONG MGA KAPARIAN NGA GIGUTOM UG GIKAPOY NA INTAWON ANG KATAWHAN BUSA DILI NATO SILA ANGAY PABUNTAGAN - TIME MANAGEMENT ANG GIKINAHANGLAN SA  SUGAT KABANHAWAN NGA NAKAPALAGOT-SUBO SA KADAGHANAN.

UG HINAOT PA UNTA NGA MAKA-KOLEKTA NA GAYUD UG BUHIS ANG B.I.R. SA MGA PROMOTOR, TALENT MANAGERS, MAKE-UP ARTISTS, CHOREOGRAPHERS UG UBAN PA SA MGA MOABOT NGA SUGAT-KABANHAWAN SA MINGLANILLA!

SOSYAL PENSION ALANG SA MGA SENIOR CITIZENS

Mao kini ang bag-ong awit karon, sayon ang tuno apan makalibog ang liriko – SOCIAL PENSION FOR INDIGENT SENIOR CITIZENS!   Maka-diyos ang tumong apan may pagka-demonyo ang pamaagi.  Haom kaayo sa gi-ingong bitter-sweet refrain.

Sa kinatibuk-an, ania ang mga guidelines.

Sosyal Pension, hinabang alang kang Lolo ug Lola gikan sa Gobyernong mapinanga-on alang sa mga senior citizens nga:

1 – 77 anyos ang edad

2 – wala magdawat ug pensyon gikan sa GSIS, SSS o AFPMBAI ug kaha gikan sa usa ka compania de seguro

3 – luya  o galuya,  may apan ang panglawas

4 – walay gisaligan nga kita o income

5 – walay madawat nga hinabang o suporta gikan sa mga anak o paryente alang sa inadlaw nga panginahanglan

6 – nagpuyo nga nag-inusara, halayo sa pamilya

Kung ikaw nga senior citizen anaa sa maong pagkabutang ug wala malakip sa listahan sa DSWD, pakigkita lamang sa Hepe sa OSCA sa inyong dapit.

Pastilan kahilas.  Sayon basayon apan lisud sabton.  Dili user-friendly ang  mga resikitos niini. 

Simpol  lang ang akong pagsabot niini.  Ang gipangita sa Gobyerno mao kadtong mga tigulang nga libud suroy ug walay permamenteng katulgan nga sagad atong makita didto sa kaulohan apan talagsa ra sa probinsya. 

Hinuon ato lang gihapon kining paga-sulayan kay bisan tuod ang pagtabang mahimong dili angay, aduna ra gihapoy matabangan.

Apan daghan ang mahiubos, maglagot, magaway ba hinuon  ilabi na sa sitwasyon nga ang MO-apply dili higustohan sa mga mo-aprobar sa pensyon kay rekomendado man sa kaatbang.

Unya kung pagasundon gayod ang mga giya sa itaas, kon dili kini bali-on bisan gamay o lugakan ba hinuon dungan sa kaluoy – ambot kon aduna pa bay maka-apil sa maong programa gikan sa atoa.

Busa mamasin ako uban sa walay paglungang pag-ampo nga Ikaw Manoy, Manang, Lolo, Lola, Ingko, Insi nga naginusara na ning kalibutan ug kapin nag 77 anyos apan sa gihapon nagkadusingot aron mabuhi, makaapil ba sa HINABANG (dili limos) NI LOLO’T LOLA.

 

UNSA MAN KINING INSURANS NGA DILI INSURANCE

Usa kini ka matang sa hinabang diin ang modawat mao ra usab ang mitabang.  Usa kini ka self-serving privilege-benefit alang sa mga sakop sa Minglanilla Municipal Federation of Senior Citizens (MIMUFESCAP)  mag-walo ka tuig na karon.  Ang tuyo ug tumong mao lamang aron kahatagan ug hinabang pinansyal ang pamilya sa mo-goodbye nga senior citizen.

Ang balayranan niini tag P30 ang bulan ug ang madawat nga kantidad walo ka libo ka pesos ug padayon ang pagsaka niini sa walay pag-umento sa binuwang obligasyon.

Sa personal kong pagtan-aw, gibuhat kini sa Pederasyon paglingaw sa mga tigulang hangtud moabot ang panahon nga makadawat na silag susama niini o labaw pa nga mga hinabang pinansyal gikan mismo sa kaban sa Lungsod sa Minglanilla.

........... ug gitawag kinig insurance sa mga senior citizens.

Kining insurans nga dili insurance nag-una ug katawo sa DBA kon Death Benefit Assistance sa Expanded Senior Citizens Act of 2010 kon RA#9994 isip hinabang pinansyal kon adunay mopanaw nga senior citizen.

Kon atong estudyohan ang IRR sa maong balaodnon diha sa Artikulo 20, Seksyon No. 4, atong makita ang kasayon ug ang kagaan niini nga bisan ang mga 3rd ug 4th class municipalities  makahimo pagpatuman gayod.  

Pananglitan dinhi sa ato, nagkinahanglan lamang  kitag mga P250,000 isip pundo sa usa ka tuig aron mahatagan ug tag P2,000 ang 125 ka pamilya sa mamatay nga usa ka gatus ug kawha-an ug  lima ka senior citizen sa walay pagpili sa edad ug pagkabutang nga gisalamin diha sa balaodnon.  Ug ang nakaayo niini mao nga sa miaging 3-5 ka tuig, diyutay ra ang mga seniors nga nabugto-an sa ginhawa busa seguradong adunay carry over fund o savings matag tuig.

Kining insurans nga dili insurance mao ang lokal bersyon sa DBA sa Pederasyon apan binayran.  Ug dili kini insurance kay ang MIMUFESCAP dili man kompaniya sa seguro.  Ang rekesito usab nga medical examination wala ipatuman sa mga boluntaryong magpasakop niini nga 60-70 anyos ang pangidaron.  Unya ang binulang kontribusyon nga trayenta pesos dili usab insurance premium kay mahimo ra kining hikalimtan sa gidugayon nga 90 ka adlaw sa walay pagkaputol sa benepisyo. Ug mas daghang tigulang ang malipay niini kay sa pensyon nga alang lamang sa mga pinili ug indigent seniors.

(Adunay daghang isyus kabahin sa senior citizens sa Minglanilla, sama ini:

SENIOR CITIZENS PURCHASE BOOKLET MINGLANILLA-EDITION

www.rovilci.blogspot.com  ).

SENIOR KA, ATO NI

Ang Senior Citizen ug ang Minglanilla sa 2013

Ang IRA sa Minglanilla maoy ika-2 labing dako sa Probinsya sa Sugbo karong tuiga - PHP127,702,411.00 ug ang Lungsod mokita pa gayud ug kapin-kulang PHP25,000,000.00 gikan sa koleksyon sa buhis ug uban pa.  Seguro na man, dili bug-at nga ihatag sa mga senior citizens, sa walay pag-puna sa edad,  ang hinabang pinansyal nga dos mil pesos (Art. 20, Sec. 4, IRR, RA#9994) ang Death Benefit Assistance sa mamatay nga miembro sa Pederasyon.  Dili usab labad sa ulo ang lain pang hinabang pinansyal isip partial refund sa balayranan sa ospital kong ma-admit ang senior citizen membro sa Pederasyon sa walay pag-puna sa edad.  Sa miaging tulo ka tuig, wala abtig gatus ka mga tigulang ang nangamatay kada tuig ug diyutay ra usab ang na-admit sa mga ospital!  Dili na kinahanglan pa-abton pag 75 anyos ang mga senior citizens aron matilawan ang dugang matam-is nga pagmahal sa Gobyerno Lokal sa Minglanilla.  (PS – Kon ikaw adunay kasayuran sa gibadget nga koleksyon sa buhis, palihug i-post o i-text aron ma-update kini)

Kalipikasyon sa mamahimong nominado sa posisyon Hepe sa OSCA

-Nga siya Filipino ug nagpuyo sa Minglanilla sa gidugayon dili mo-menos usa ka tuig’

-Nga siya rehistradong botante sa Lungsod;

-Nga siya makamaong mobasa ug mosulat;

-Nga siya himsog ug panglawas ug normal ang dagan sa pangisip;

-Nga siya usa ka aktibong miembro sa miaging tulo katuig sa

  MIMUFESCAP (nakabayad sa tanang legal nga balayranan ug nangilabot  

  sa mga miting ug sa ubang aktibidades);

-Nga siya respitadong miembro sa komunidad, maayog taras ug walay ilegal nga binuhatan;

-Nga siya edukado, naka-human ug hayskol;

-Nga siya kalakip sa gituboy sa puwesto diha sa usa ka miting sa Pederasyon.

Ang Buluhaton sa Hepe sa OSCA

1.          Human mokonsulta sa Hepe sa MSWDO ug sa Pederasyon, ang Hepe sa OSCA maghimo siya sa tiningub nga plano o programa sang-ayon sa RA#9994 ug mga balaodnon.  Unya nga iyang bantayan ang pagpatuman niini;.

2.        Siya mohimog listahan sa mga posibleng serbisyo nga ikatampo sa mga miembro sa Pederasyon ngadto sa komunidad;

3.         Siya mopahigayon sa tanan aron ikahatag sa senior citizen ang New ID Card, New Purchase Booklet (32 ka aytem na karon) ug ang Purchase Slip.  Siya maghimog “updated list” sa mga senior citizens matag 4 ka bulan;

4.        Siya maoy mopahibalo sa Mayor sa mga kalapasan ni bisan kinsa, kumpaniya, ahensya o opisina sa gobyerno sa mga probisyon sa RA#9994;

Siya maoy mopahigayon nga ka-aksyonan sa DOJ ug sa mga korte municipal ug probinsyal ang mga reklamo sa senior citizens;

Ingon man siya usab ang moabi-abi sa mga nagreklamo batok sa abusadong Senior Citizen nga buot mamentaha sa mga pribilihiyo;

5.         Siya maoy mobarog isip tsirman sa Municipal Coordinating and Monitoring Board nga molutas sa mga reklamo.  Ang miembro niini mao kining mosunod:  Hepe sa OSCA, Hepe sa MSWDO, President sa Pederasyon.

6.        Siya mohimog mga lakang aron mahiusa ang mga Non-Governmental Organizations ug Peoples Organizations diha sa mga Barangay pagkab-ot sa tiningub nga ka-akuhan aron ma-atiman ang mga senior citizens sa Lungsod.

7.          Siya mao ang ilhong opisyal nga tagtubag sa mga pangutana kabahin sa Senior Citizens.

(Ako ang tanang sayop, walay labot ang MIMUFESCAP)

INTRODUCING WARD 4 ELECTION

Usa ka talent-filled community leader si Barangay Tsirman Antero Jun Cana.  Ang nakadaot lang nagpadayon siya sa iyang gibati ug nalimtan niya nga ang Ward 4 dili gustog Prayle, Anito o Amo kon dili usa ka Indiong Sulugoon, maki-diyos dili maka-hiyos.

Ug tungod sa gidangatan sa Barangay Ward 4 karon, ilabi na sa pagka-putol sa Selma Magic nga nasugdan kaniadto panahon ni Kap Berting Villasencio, mas modaghan karon ang gustong magpapili – mga utokan  ug ang walay kasinatian, mga balik-barangay ug mga bagito sa pang-gobiyerno – ang makama-o ug ang makamo-ahh. 

1^st on the Firing Line

Natural lang magpapili pag-usab ang maayong laking Kapitan Antero Cana.  Well-known si Kap Jun sa iyang mga antiks pagdani sa mga botante.  Usa sa iyang sapyaw mao ang pagpatapok sa katawhan diha sa mga kasilinganan, dala ang mga saad ug pa-alegre ug ang higanteng papremyo nga kaniadto gitawag ug Abag Silingan.

Si Kap Antero nakahimog dakong sala sa katawhan.  Tungod sa iyang economic plans wala niya mahatag ang basic services sa kadaghanan.  Gani wala pa niya mapalusot ang Barangay Annual Budget ning tuiga ug nga ingon usab niini ang nahitabo sa mga miaging tuig diin nadiskaril hapit tanan sama sa pagkaputol sa suga, telefono, ug tubig sa Barangay Hall, Health Center, ug Day-Care Center.  Ang mga konsehales lamang ang regular nga nagpirma ug payroll sa honorarium ug ang uban pagatagaan lamang samag makalilimos.

2^nd  on the Firing Line

Ang nagsunod sa lakang ni Kap Jun mao si No. 1 Konsehal Oming Nable nga karon nagsugod nag porma ug grupo.  Ilhado si Oming sa iyang pagka-kabalyero ug uban pa.  Maayo siyang mopahigayon ug mosuportag community activities samag feeding ug padula diin siya mao ang mahimong major donor.  Daghan kono siyag mga dagkong proyekto with pictures pa isip Tsirman sa Infra Committee.   Sama ni Kap Jun si Kon Om lisod makit-an sa Barangay, lisod sab duolon kay talagsa ra mo-pakita panahon sa opisyal nga oras.

3^rd, 4^th, 5^th on the Firing Line

Sa pagkakaron on-n-off pa ang sitwasyon sa posibleng pagbalik ni Kap Berting Villasencio.  Ug tungod niini bukas gihapon ang posibilidad nga magpapili gayod si Konsehal Kelvin Unabia ug kanhi Konsehal Ramon Tabora pagka-kapitan.  Hanpik ni Kap Berting kaniadto si Konsehal Ramon ug dili na kinahanglang idetalya pa ang mga bunga sa ilang pagkamaayong sulugoon sa Ward 4.

6^th, 7^th, 8^th , 9^th on the Firing Line

Nagpabilin ang posibIlidad nga mahinayon na gayod ug pagpapili si Mam Norma Pimentel  ug usab sa anak ni Doktora Aida Sabit nga si Bukoy.  Gawas kanila aduna pay lain nga nagpakitag interes sila Jerome Tan ug si never surrender Carlito Reyes.

Sila Mam Norma ug Bukoy aduna nay particular nga kasinatian pambarangay.  Batan-on ug abtik si Bukoy apan ingon ug usa ka dakong surprisa ang iyang interes sa Ward 4.  Ang balita mao nga giagni siya sa tawo nga mituboy ni Kap Antero niadtong eleksyon sa 2010.

Maayong tawo ug silingan kini si Carlito.  Ug sayod ang kadaghanan sa Ward 4 giunsa pagdala ni Jerome Tan ang iyang dedikasyon isip presidente sa Zona 6 ug sa Kapelya sa Kacom.  

POR DE REKORD

Sa miaging Biernes petsa 10 sa Mayo nagkatigum ang dosientos singkuwenta ka mga senior citizens sa Multi-purpose Hall sa Minglanilla aron madungog ang posibleng pagdinayganay sa  tagsa-tagsa ka pulitikanhong plataporma sa Team Canada-Geonzon ug Team Pena-Selma.

Walay maski usa sa Team Canada-Geonzon ang mitunga ug nagpadala lamang ug mensahero ang Team Pena-Selma sa katauhan ni Mr. Eric Pagar, usa ka inilang brodkaster.

Dala ni Eric ang pagpangayog pasaylo ni Vice-Mayor Lanie Pena ang gitahasan sa grupo pagtambong tungod sa usa ka emergency.

Dala usab ni Mr. Pagar ang duruha ka mga balita.  Ang maayo nga nagkanayon nga ang P43,000 nga utang sa mga seniors sa miaging x-mas party hapit na gayod ma-release.  Ug ang ikaduha:  157 lamang ka mga senior citizens ang mahatagan sa pension karong 2014 sa administrasyong Pena-Selma.

Ang kahulugan niini mao:

1)       Nga ang gisaad sa Team Pena-Selma sa piniliay karon  makapahiubos pag-ayo sa mas daghan nga mga seniors nga uhaw sa ayuda.

2)       Ang maong saad nagkahulugan pagasto ug milyones pesos aron malipay ang kapirangot nga seniors, samtang kapin 3,500 kanila maglagot, masakitan, o mamatay ba hinuon tungod sa kaguol.

Angay hinumduman nga ang Munisipyo sa Minglanilla walay budgeted hinabang pinansyal sa mga seniors nga ma-ospital o mamatay.  Ug kanang tsinelas-gatas-sardinas-reading glasses package gikan sa Gobernador sa Sugbo.  

Ug kon aduna man, wala kini maklaro diha sa GAD PLAN o sa badget Support for OSCA Operations.  Ngano, makahimo ba gayud ang Munisipyo sa Minglanilla paghatag ug hinabang pinansyal sa mga tigulang?  Dili lang YES kon dili half-million to 1-million pesos, PUEDE KAAYO!

ANG MISTERIO SA KAPAIT

4/25/2013 – Sa pulong-pulong sa Team Pena-Selma gabii sa Ward 4, gihangyo si Jaime Caumeran ang mga nanambong pagbotar kaniya pagka-konsehal.  Malaomon siya nga matudlong sunod nga tsirman sa pundok sa mga kababaehan, PDWs, ug sa senior citizens. 

Gipadayag ni konsehal-to-be Jaime ang iyang kontra panan-aw sa pasalig sa Team Canada-Geonzon pagpagawas ug 1.2 milyones pesos nga pundong salapi sa mga programa sa senior citizens dinhi sa ato.

Tingali tungod sa akong napulo ka tuig nga kasinatian isip tesorero sa barangay ug sa lima usab ka tuig nga pagpamati sa bakho sa mga tigulang, gitab-angan ko sa emosyon nga iyang gipakita sa entablado sa kampanya.

Sa miaging semana, gipangutana ni Sam Rafaela sa Tunghaan ang GAD-tsirman nga si Konsehal Cording Mejias kabahin sa senior citizens badgeting sa Lungsod.  Diha sa maong tigum ang badget opiser nga si Mam Ara ug si Mam Lanie ang hepe sa DILG.

Kanhi presidente sa Federation of Farmers sa Guipos Pagadian si Pare Sam busa aduna siyay igong kasinatian sa relasyon ug  balaodon nga nagdugtong sa gobyerno ug mga NGOs sama sa Minglanilla Municipal Federation of Senior Citizens. 

Buot ni Sam makompirma ang gingi sa pagtagad ning Lungsod sa mga tigulang sa 19 ka-barangay diha sa bakikaw niini nga pag-serbisyo.  Apan bigo siya kay mao ra gihapon ang mga pamahayag - rewind sa nanglabayng katuigan.

From Konsehal Cording to Konsehal-to-Be Jaime

Junior citizen pa si Konsehal Cording ug  feeling differently gihapon si K2B Jaime bisan usa na siya ka senior citizen.  Mas bug-at gihapon alang kanila  ang dictum MAINSTREAMING, LACK OF FUNDS  o  NO FUNDS AVAILABLE  kaysa malimtanon ug nag-aginod na nga Senior Citizen.

Unsa man ang mga Priveleges nga gikan sa Lungsod?

Dili malalis nga duha kahigayon matag tuig, MANUG-AB sa kabusog ang mga tigulang gamit ang pundo sa Lungsod.  (Gawas niini, wala na!)

Pagbuot sa balaod nga sila dili magbayad sa ID card, sa Purchase Slip ug sa Purchase Booklet alang sa diskwento sa tambal, ug sa basic necessities ug prime commodities.

Ang akong pagsumada sa tanan mokabat lamang kinig P230,000.00, o "hinabang" nga P70 matag senior citizen nga buhi sulod usa ka tuig.  

Walay labot sa kwenta ang palibreng gatas-tsinelas-haplas ug reding glass nga gikan sa Kapitolyo, ingon man ang binulang pension nga tag P500 gikan sa gobierno nasyonal ngadto sa 34 o 36 ka buok tigulang sa Minglanilla.

Pahasukip

Ang Team Canada-Geonzon mipasalig nga sugdan nila ang usa ka seriosong pagtagad sa mga tigulang karong tuiga gayud!  Ang Team Pena-Selma nangangkon nga aduna usab silay ila sunod tuig 2014 gamit ang pormula:

                                        60 sorry || 77 okay  

Ug si kinsa man kanila ang modaog sa piniliay, hinaot nga walay usa sa grupo ang mahimong kahoy, bunal, langsang ug tunok sa Misterio sa Kapait sa mga Senior Citizens!  

Ward 4 – Hotspot sa Piniliay?

Motuo mog sa dili, pirming pildi si Mayor Selma sa Ward 4.  Sa panahon lamang ni Kap Berting nga una niyang natilawan ang katam-is sa kadaogan nga milanat hangtud sa piniliay 2010.

Sa wala pa manaog si Kap Berting sa pangatungdanan, iyang gihangyo ni Konsehal Ramon Tabora paglangsad aron mapadayon ang nasugdan na nga kalambuan sa barangay.   Bale usa ka adlaw niana panahon sa kampanya, gidala ni Kap Berting ang Grupo aron ipa-ila ug ikahimamat ang Mayor.

Apan pakyas sila bisan didto na ang tanan sa may pultang-bildo sa opisina sa Mayor.   Napugngan ang ilang tuyo kay gidid-an  man sila pagsulod sa opisina kay “busy ang Mayor.”   Apan daghan ang naka-saksi nga gabahis-balik daw bida sa entablado ang kandidato kinsa nangangkon nang daan layo pa ang piniliay nga siya maoy gipaloyohan sa Mayor ug suportado pa gayod sa Gobernador -  ang Kapitan karon nga si Antero Jun Cana.

Tungod sa iyang maamong buot, wala ikapakita ni Kap Berting ang mga senyales sa iyang kahiubos hangtud sa katapusang adlaw niya sa Barangay Hall.  Apan ang samang kasakit, gitipigan sa mga tawo nga nagsunod-budlay uban kaniya.

Ang piniliay sunod bulan kabahin sa tunok sa gidangatan sa pundok ni Kap Berting ug Ramon sa nahanawng paglaom sa mga taga Ward 4 nga magpadayon ang nasugdan na nga kalamboan.  Busa nunot sa panahon, molaganap ang kainit sa bugnong lugaynon nga mosulay  sa paguba karon sa Fortaleza Selma.

Magmalamposon kaha kining Team Selma-Pena karon paghakot sa mas daghang boto sa Ward 4?   Di ba kaha ning higayona, diha sa pagdumala ni Kap Jun Cana, maputol hinuon ang kinse ka tuig nga WINNING TREK ni Mayor Eddie sa Ward 4?    

(Usa ako sa pabor nga wagtangon na lang ang mga poster areas kay ang mga propaganda maghatag man ug ka-alegre sa piniliay.  Ato lang kining ipakuha unya sa mga kandidato) 

MGA PANAHON NGA INGON NIINI

SAYO SILANG NANGABOT ARON UNTA MAHMAMAT

4/12/13 - Nagkatapok karong adlawa ang mga senior citizens sa desi-nuybe ka barangay sa Minglanilla.  Hinuon ang ihap sa mga nanambong miabot lamang ug dosientos dies, ug kadaghanan kanila mga bag-ong salta sa Barangay Ubanon.

Alas dose imedya pa lang, aduna nay singkwenta ka mga senior citizens nga mi-ukopa sa mga lingkoranan didto sa Parish Multipurpose Hall , gikan sa Manduang, Guindarohan, Kampo 7 ug 8.  Sayo sila nga nangabot kay nasagap nila ang balita nga makig-himamat ang mga taga Team Selma-Pena kanila.  

ANG MGA KANDIDATO SA TEAM SELMA-PENA

Ang mga tigulang nanaglaom nga sa maong higayon mapa-abot nila ang kasagmuyo sa nagkaawop nga panan-aw sa namunu-an ning Lungsod kabahin sa uno porsientong gahing salapi alang sa mga taga Barangay Ubanon.  

Pagka-alas tres na sa hapon gidalit ang snaks nga tinapay nga walay palaman.    Luoy kaayo tan-awon ang mga tigulang nga naglisud usab  pagtulon sa pan tungod lagi kay wala man kini patabani bisag tubig man lang.

Alas-kuwatro na lang sa hapon apan walay mipatim-aw bisag anino na lang gikan sa Team Selma-Pena.   

Ug sa pag-abot na sa Sing Your Way Home time  diha na hibaloi sa mga Tigulang nga dili na diay moabot  ang Team Selma-Pena tungod sa kakulian nga wala tuyo-a (nga mao ang suroy-kampanya sa Team  didto sa Ward 4 ug 2) –   ug nga  sa sunod miting na lang sila makig-himamat kanila, petsa dies sa Mayo. 

Pangutana, asa man diay kutob ang panahon sa pagpa-ngampanya? 

Kon ingon na lang niini ang panahon kanunay, kawad-an na gayod ug gana ang mga Ubanon ug mahimo silang buta ug bungol usab sama sa mga taga-munisipyo nga nagmagahi hangtud karon sa paghatag sa benepisyo sa mga senior citizens sa Minglanilla.

KAPIN 20 KA MGA SENIOR CITIZENS ANG NAG-BIRTHDAY NING BULAN SA ABRIL

GIHATAGAN SILAG MGA GASA SA MGA KAUBAN NILANG MGA UBANON

DILI IKAG-LIMOD NGA KINING MGA NANAG-BIRTHDAY KARON NAGLAOM NGA ADUNA SILAY MAPAABOT GIKAN SA MUNISIPYO.

SI LOLO UWENG

“Wala na siya dinhi; kay siya nabanhaw, sumala sa iyang giingon.

 Umari kamo, tan-awa ninyo ang dapit nga iyang nahimutangan.”  (Matthew 28:6)

Kinsa kaninyo nga lumad taga-Minglanilla ang nakaila kang Lolo Uweng?  Sayon kaayo ang pag-ila ni Lolo Uwe o Uweng.  Ang gikinahanglan lamang mao ang kinatibuk-ang pagsabut sa mga terminong Santo Entierro, Santo Sepulcro, ug Haya.  Ang kahulugan niining tanan mao “Ang Pag-prosisyon sa Patayng Lawas ni Jesus Padulong sa Kalubngan.”  Ug kini mao Siya, ang milagrosong Lolo Uweng sa Simbahan sa Landayan, San Pedro, Laguna ang Shrine of Jesus in the Holy Sepulchre ( http://holysepulchreshrine.com/  )

Apan kay si Lolo Uweng gi-ukit man ug tawhanong mga kamot, nagkada-iya ang iyang hugis, panagway, ug kolor sa mga dapit diin siya gipasidungan ug gimahal.  Ug sa miaging Viernes Santo sa ato, akong ipa-ambit karon kining wala damhang hulagway-digital nga kuha sa usa ka ordinaryong 5-megapixel Sanyo Camera.

Hulagway kini sa Haya sa Minglanilla (o Lolo Uweng sa mga taga-Laguna) sa dihang gipahiluna Siya didto sa sala sa balay sa akong uyoan nga si Antonio Cana Villordon y Heruela sa Barangay Tunghaan.  Ang giusab ko lang niini  pina-agig usa ka digital-retouching mao ang kolor sa iyang nawong aron maduol sa kolor sa panit sa tawo.  Gipahimuslan ko usab ang pagamit sa natural nga kahayag gikan sa gawas sa balay.  Ug sayri nga ang ngalang Uwe o Uweng mao ang tradisyonal nga angga sa ngalang Emmanuel.

Usa ka hamubong sugilanon kabahin sa Haya sa Minglanilla mabasa sa:

http://tayaonglapis.blogspot.com/2011/05/duha-ang-rebolto-sa-santo-entierro-sa.html 

ADLAW-ADLAW NGA

PAG-DEBOSYON SA HAYA NI JESUS

Makagagahom ug mahigugmaong Jesus, patalinghugi kining akong pagsangpit kanimo bisan dili angay tungod sa kadaghan sa akong mga sala nga nabuhat.  Pasayloa intawon ako kay gibasolan ko na ang tanan nakong kalapasan nga nakapahimulag kanako sa bagong kinabuhi tungod sa kamatayon mo Cruz.

Himoa nga dili na ako mahimulag pa kanimo diha sa ma-kanunayong pagpalandong sa imong kamatayon ug sa paghigugma sa akong isig-kaingon sa adlawg tanan.

Sagradong Lawas ni Jesus, ipadangat nga mabatunan ko ang bunga sa imong pagpanubos gikan karon hangtud nga modangat ako sa Gingharian sa Amahan kinsa nagahari uban Kanimo ug sa Espiritu Santo, Dios nga  usa hangtud sa kahangturan.

Taposan pinaagi sa pag-ampo ug Amahan Namo, Maghimaya ka Maria, Gloria Patri ug Requiem.  Kining  pag-debosyon paga-ubanan usab sa  pagsimba ug pagkalawat sa adlawng tanan o matag adlawng Biernes. 


Idungag ang pag-ampo sa Litaniya sa Pasyon ni Jesus sa adlawng Biernes nga mahimong i-download (Latin o Englis) dinhi:  
http://www.preces-latinae.org/thesaurus/Filius/LitVitaePass.html

  

TEAM PATAY, TEAM BUHAY

Kausaban o Ipadayon ang Kausaban.  Mao kini ang sagad natong madungog panahon sa piniliay.  May kausaban ba sa mao gihapon o gikinahanglan na ang pag-ilis aron mapatuman ang maki-angayong kausaban?  Nakaayo ba  ang dynastiya kanato o nagdulot kinig endemikong kahiwian? 

Sa Mayo trese ning tuig, mahatagan na usab kitag kahigayonan pagpili sa mga tawong buot mosilbi o magpasilbi  kanato.  Libre kitang mopili, libre usab modawat kon adunay idunol.  Hinuon sayod na kita nga adunay kabayaran ang pagbaligya sa boto.

Magkalahi man ang atong sukdanan sa pagpili mahimong magkahiusa kita ug kawsa, sama pananglit sa hinaing sa mga Senior Citizens nga madawat na nila ang uno porsentong gahing salapi gikan sa panudlanan sa Lungsod nga karon moabot nag kapin 150-milyones pesos ang tuig.  

Apan mahimo na ba nga ihatag na kini kanila sa walay kabilingan?  Mahimo kaayo ug dugay na unta apan nagpabiling matig-a ang mga nanilbihan ning Lungsod.   Adunay duruha ka nawong ang mga antogon sa piniliay.  Ang nawong sa Hari sa usa ka bahin ug sa pikas ang sa Korona - ang  Team Buhay  ug  Team Patay  sa piniliay.

MGA BUTA UG BUNGOL UG WALAY KONSENSYA 

KONTRA-SENIOR CITIZENS

ANG MGA TAGA  TEAM PATAY

1.   Si Konsehal nga diha sa iyang pangatungdanan wala mohimog

 lakang aron ikahatag na ang 1% gahin sa mga Tigulang

2.  Si Konsehal nga hangtud karon mo-insister gihapon nga walay

igong  pundo ang Lungsod alang sa mga Senior Citizens

3. Si Konsehal nga mobabag sa tinguha sa kaubang Konsehal

paghatag  panabang sa mga Tigulang

4. Si Konsehal nga kusog mohatag apan nagpaka buta-bungol sa

kinatibuk-ang panginahanglan sa mga Senior Citizens

ADUNAY KONSENSYA

DAPIG-SENIOR CITIZENS

ANG MGA TAGA   TEAM BUHAY 

1.  Si Konsehal nga sa kanunay nagmahal sa mga Tigulang

sukad pa kaniadto hangtud karon

2.  Si Konsehal nga gihikawan ug katungod sa pagpakita sa iyang

katakos sa pagtabang sa katawhan

3.  Si Bagitong Pulitiko ug ang iyang buot buhaton nga naghatag

ug bag-ong paglaom sa mga Senior Citizens

P.S.:   Ang  Team Buhay dili lang para nila Lolo, Lola, Ingko, Insi

Tatay ug Nanay – para kini sa tanan nga gi-uhaw ug kausaban ug nga
gadulong na sa kasadpan

Tinuod nga dili nato maseguro ang umaabot, apan ang naseguro karon mao nga sa miaging unom ka tuig wala nila ikahatag ang bulawanong damgo sa PUNDOK UBANON.