BARANGAY WARD 4 – MOAWAS NA USAB ANG SAPA KABUNGAHAN?

Sulod sa pipila ka mga adlaw sa miaging 3 o 4 ka bulan, ang puthaw nga gi-ali diha tampi sa Sapa Kabungahan, Barangay Ward 4 ning Lungsod sa Minglanilla nahimong dakong isyu sa mga pagtapok-tapok sa nabalaka kaayong mga residente. Ang bali-balita nakonpirma nga tinuod ug nga nagadulot kinig peligro sa kinabuhi ug kabtangan sama sa gipamatuod sa mga hulagway dinhi for the record.

Apan hangtud karon nagpabilin sa gihapon nga usa ka makuyaw nga tanghaga ang maong kamatuoran ug kon dili kini mahatagan ug pagtagad moabot gayod ang lain pang katalagman. Ug ang hinungdan niini mao tungod sa padayon nga pagbaliwala ug pagtabon sa kamatuoran niining mga mosunod:

1. Ang mga nag-plano sa maong puthaw nga ali;
2. Ang nga nagpahigayon ug nag-montar sa maong ali;
3. Ang mga lider sa dapit diin gibutang ang maong ali;
4. Ang mga naka-benipisyo sa maong ali;
5. Ug ang mga ma-apektohan sa katalagman.

Pinasikad sa mga huhungihong ang sugilanon sa aling puthaw daw ma-ingon-ingon niini:

Ang Sapa sa Kabungahan sa Barangay Ward 4 notado na kaayo nga magdala sa mga dinahiling balas, bato, gapnod, anod, ug basura ngadto sa silingang Barangay Ward 2.  Busa ang mga lider sa apektadong Barangay nakahuna-huna sa pagbutang ug ali sa maong Sapa lapas sa utlanan aron masala ilabi na ang mga sagbot ug basura.  Gihimo-an dayon sa mga engineering boys ug corrugated bar nga harang nga may gihabugon nga 4 metros ug gitas-on nga mga napulo ka tiil.  Gitaod kini sa engineering crew sa panahon nga gitiwas paghuman ang Day Care Center sa Ward 4.  Ug duna pay laing mga harang-puthaw nga gi-andam sa ubang lokasyon.  Kining tanan KONO wala mapa-abot sa atensyon sa kapitan sa Ward 4 kay  sa dihang gipangutana siya sa mga nangahadlok nga mga taga-Ward 4 wala siya mangilabot.  Gani adunay tambag nga mas maayo pag hinay-hinayon pag-gabas ang maong ali ug ang puthaw ibaligya sa scrap dealer aron mapahimuslan.  Ug karon ang maong ali dili lang nakaharang sa mga anod kon dili nakapahinay sa daloy sa tubig sa sapa ug nga possible kining mo-awas ngadto sa mga kabalayan.

Ang maong isyu uban ang kamatuoran kinsa ug ngano nga gibuhat kini naglarawan lamang sa pagka-bogo, pagpasagad, ug pagka-inutil ilabi na sa mga tawong responsable niini.  Ang gihimo nila usa ka ILLEGAL nga buhat, peligroso ug sila lamang ang dapat patubagon kon simbako moabot na ang lain pang katalagman sa Ward 4.