TAGNA O TSAMBA

Sa Disyembre sa miaging tuig nagsulat akog lyriko nga gipahaom-buhi sa orihinalng awit ni Yoyoy Villame.  Ania ang pipila ka linya sa maong gipahaom nga awit:

WARD 4 KRISMAS TREE

(tuno:  "Nabali ang Christmas Tree")

Pagdungo jud sa BAPOR

Milahos kamis Ward 4

Uban mga siLINGAN

Naghimo kamig Krismas TREE

Taas ang among Krismas TREE

Pipten pet daw hiGANTE

Daghan ang mga SUGA

May pula, asul, ug BERDE

**Unya dayon may mikatkat

Sila Bleben ug Koree

Ita-od nila ang estar

Sa tumoy sa Krismas tree

(for the complete song follow this link: 

http://tayaonglapis.blogspot.com/2011/12/lungsod-sa-minglanilla-ward-4.html

Panagna

Ang akong nabuhat nahisamag usa ka panagna kay ning tuig 2012 bulan sa Disyembre, Natawo gayud ang maong KrismasTree.  Wala ko magdahom nga kining Krismas Tree mousbong mismo sa dapit diin una nakong nahunahuna ang lyriko sa maong awit sa tuig nga milabay 2011.  Kahibulongan dili ba?

Natuman

Krismas Tree sa Sitio Fatima

Ang katumanan mao kining Krismas Tree nga makita sa PYO basketbol kort Sitio Sunflower Ward 4 ning Lungsod nga nagsimbolo sa panaghiusa ug pagsinabtanay sa manag-silingan.  

Laing Katumanan

Krismas Tree sa Barangay

Ang tanghaga wala matapos sa PYO basketbol kort ug mipadayon kini latas-labang sa kanhi basketbol kort atubangan-ligas sa Ward 4 Barangay Hall. Niining tuiga ang mga opisyal sa Barangay Ward 4 nagmug-na ug mala-higanteng Krismas Tree pipila ka metros lamang gikan sa SunflowserTree sa karaan nga Barangay Basketbol Kort.  Hinuon ang basketbol kort karon gihimo na nga usa ka Plaza sa Barangay sa administrasyon Cana bisan libon ug hilan pa ang maong dapit.

Tagna o Tsamba

Kon kining duruha ka katumanan usa ka majik sa pasko, o imbento-personal, lamang, kamo na lang ang mopahigayon sa inyong mga kabubut-on.

Meri Krismas, Hapi New Yer

Kon pananglit dili jud kapugngan nga adunay molutaw nga komentaryo niining duruha ka managsilingang Krismas Tree, iluom na lamang kini uban sa inyong silingan.  Apan baya kay panahon sa Pasko karon isalikway nato ang pag-panaway ug pagbiay-biay - ang mga Satanas sa nagkapiyo-os nga kabubut-on.

(P.S.  Ang Krismas Tree sa sitio Sunflower mao ang gipadayon nga tradisyon sa Pasko diin sa nanglabay nga mga katuigan aduna gayoy Paskohanong simbolo nga makita diha sa maong dapit sama niadtong Ward 4 Stars sa tuig 2009 ug tuig 2010 ug ang Pasungan sa tuig 2011.)

STAR OF WARD 4

(The following is a reprint of an internet article of Friday, the 10th of December 2010 as per request of a friend)  

Bitoon nga Sirius

Daghang klase ug gidak-on ang mga bitoon.  Adunay siga kaayo sama sa Bitoon Sirius, pid-ok sama sa nagkatipun-og nga bitoon Tatak NGC63907.  Adunay gagmay sama sa Pulang Duwende OGLE-TR-122b ug mala-higanteng mga bitoon sama sa Eta Carinae nga may gidak-ong 400 kabuok Adlaw.

Bitoon nga Carinae

Kadaghanan sa mga bitoon atong makita sa kalangitan inig abot sa kangitngit.  Apan may pipila kanila motumaw lag panagsa ug sulod sa hamubong panahon lamang.  Kini sila mao ang mga Kometa nga maoy pasanginlan sa mga dili maayong hitabo sa kalibutan samag linog, huwaw, ug kamatay.  Sa laing panagway usab nahimo silang mga mensahero sa maayong balita sama sa Bitoon sa Bethlehem, ang Bitoon sa Pasko.

Mga Bitoon sa Dagat

Kon adunay bitoon sa dagat ug sa langit, mas asintado ang mga bitoon sa mala.  Ang sa dagat buhi, ang sa langit giya ug iwag sa kagabhion.  Apan ang sa mala dili lamang naghatag ug kahayag kon dili nahimong talisman sa mga nagkadaiyang aspeto sa atong kinabuhi.  Kini sila mao ang mga Parol sa Pasko sa Pagkatawo ni Kristo.  Ug karon sama sa gihapon naputos na ang atong palibot sa mga di-kolor ug nagdilaab nga mga Lampara sa Paglaom ug Kamaya.

Asa man nato makita ang pinaka-dakong Parol sa atong Lungsod sa Minglanilla?  Kining talagsaong bitoon nga misubang ug sayo ning tuig 2010 gi-ilang simbolo sa Kalinaw, Kauswagan, ug Kahi-usahan sama sa nag-unang parol sa miaging tuig 2009.  Nagkahulugan kini nga ang mga hingtungdan wala matay-og bisan pa man sa daghang dagok sa kinabuhi nga milanat sa tibuok tuig ilabi na sa panahon sa piniliay.   Ladies and Gentlemen, presenting, the giant magical piece of Christmas this Year - ang labing dakong parol sa  Minglanilla nga inumol sa kakugi ug determinasyon:

Ward 4  STAR 2009

Ward 4  STAR 2010

Ang parol ning tuiga nga gidesenyo samag Krus may gilapdon nga 20 ka tiil ug gitas-on nga 22.  Gipanday kini diha sa kakugi nila  Jerome Tan, Bleben Tan, Ramnick Tabora, MLT Biday Gonzaga, Hatchel Dejan, Neneth Letigio ug ang mga batan-onan sa Purok Dos, Barangay Poblacion Ward 4.  Sila mao ang mga linalang nga may bidlisiw sa puting kahayag kansang mga kasing-kasing dili putong bisan sa kapit-os.   Ang kinatibuk-ang desenyo sa duha ka parol gilalik ni Blen Tan, kinsa naila na kaayo sa iyang talagsaong abilidad sa pangamot.

Ang Estorya sa Bitoon sa Pasko

Ang Star of Bethlehem o ang Bitoon sa Pasko mao ang gituhoan nga nagiya sa tulo ka Paring Astrologo (3 Wise Men; 3 Kings) sa ilang paglawig labang sa bonbong dagat desierto aron makita nila personal ang natawo nga Kristo.  Ang maong bitoon nga giila nga usa ka Kometa wala na magpakita pag-usab sa kalibutan.  Laing pagtuki sa maong hitabo nagkanayon nga  ang kahayag nga nakita dinhi sa kalibutan nagagikan sa usa ka higanteng pagkabungag-boto sa himatyong bitoon sa halayong kawanangan (Tuig 1-6).  Gituhoan usab nga ang Bethlehem Star dili bitoon kon dili usa ka pagdibuho sa linangkob nga paglihok-sibog ug panag-dikitay sa mga Planeta nga natala sa mga tawo sa kanhiayng panahon didto sa Mediteranyo, Ehipto, ug Tsina.  Kon unsa man gayod ang misteryo sa Christmas Star nagpabilin kining dili matino hangtud karon.  Apan ang unang hitabo sa Pagkatawo ni Kristo nagpabiling buhi sa mga pulong nga tugob sa Paglaom ug Pagtoo, mga pulong nga haom sa matag panahon sa Pasko: 

¨The Star of Bethlehem cannot be naturally explained by science nor recorded by historians!  It was a temporary and supernatural light.  After all, the First Christmas was a time of miracles.¨

MERRY CHRISTMAS TO EVERYONE FROM BARANGAY POBLACION WARD 4, MINGLANILLA, CEBU, PILIPINAS

Ward 4  STAR 2010 - Gabi

Note:  In 2011, the traditional Pinoy Belen was Ward 4's pride.

             This year, 2012, a giant christmas tree and star will be lighted in this
             village where spirits are always high during Christmas.