Ikaupat
na kini ka higayon nga ako nagsulat kabahin sa ali nga puthaw nga gibabag sa
natural nga daloy sa tubig sa Sapa Kabungahan, Barangay Ward 4. Ug tapos ang makusog nga pag-ulan gahapon,
nakahimo nag mga kadaot ang maong ali.
Sumala sa
gimantala nga INTERBEYU-DAW, gipangutana si Hon. Antero Jun Cana, ang Kapitan
sa Barangay Ward 4:
Pangutana: “Kap, nganong wala man nimo tangtanga ang ali
nga puthaw diha sa sapa? Ingon imong mga
kaatbang, makababag kini sa tubig ug peligro nga moawas ang sapa ug maglunop
ang maong lugar?”
Bisan usa
ka drama lamang ang maong INTERBEYU, gitubag ni Kap Ante diha sa mantalaang
gi-imbento ra usab bag-ohay pa lang ang BALITA SA WARD 4.
Tubag: “Adunay posibilidad nga ang tinubdan sa maong
estorya, kulang ug alamag sa mathematics…………………..”
Hataas
ang saysay ni Kap Ante isip tubag sa maong pangutana. Ug mao kini ang iyang gipasabot:
1) Nga ang puthaw nga ali huyang ug nga mabawog
lamang kini sa sunod pipila ka bulan tungod sa gikusgon sa daloy sa tubig;
2) Nga ang tubig-baha igo lang mosaylo lapaw sa
maong ali bisan pag mapuno kini sa mga sagbot, ug moagi usab sa kilid
(riverbank).
3) Busa kini dili kuyaw ni makahimo ug paglunop sa
maong dapit.
Sa akong pagbisita sa dapit diin gitukod ang maong aling
puthaw human mobunok ang kusog nga pag-ulan kagahapon Mayo 31, 2012, akong natino
nga aduna nay kadaot sa kilid sa sapa ug nga namiligro ang estruktura nga
gitukod intawon sa tag-iya sa sikbit nga yuta aron kapanalipdan ang iyang balay
ug mga negosyo.
Tungod kay gipasagdan man lang ang dapit ug wala limpiyohi
sa mga anod, habog na ang gi-ambakan sa tubig ug busa mikankan pag-ayo sa
tagakanan niini ug nakahimog halawom nga daw-atabay.
Ug ang tubig nga nagpundo sa naporma nga dakong-atabay
(basin), mahimo kaayong MA-ITLOGAN SA LAMOK DENGUE.
Ug ning adlawa Hunyo 29, 2012 nahimo na kinig samag fishpond kay wala nay pagkahubas ang tubig ug dili na usab kini maka-daloy pa-ubos. Busa usa na kini ka puloy-anan sa hugaw ug kagaw ug pugaran sa mga lamok.
