Gikatakda na gayod ang pinili-ay sa mga opisyales sa pederasyon sa mga Senior Citizens ning Lungsod sa Minglanilla. Ang maong demokratikanhong katungod nga gihikaw sa mga SENCITZ sa nanglabayng mga katuigan pagahimoon sa petsa 9 sunod bulan sa Marso didto sa Multipurpose Hall sa Parokya.
Bisan tuod wala pay opisyal nga giya sa pama-agi sa maong piniliay, gikahisgutan na nga ipa-agi kini ug open nomination. Sa ingon mahatagan sa kahigayonan ang tanang Barangay Senior Citizens Chapters sa pagpili ug ilang miembro alang sa pederasyon kinsa maoy mopadangat sa ilang tingog, hangyo, ug yango-ngo.
Ug alang sa mga bag-ong mapili, palihug ayaw laktawi kining mosunod nga mga punto alang sa kalambo-an sa Senior Citizens Federation ning Lungsod.
1. Kinasing-kasing nga paghangyo sa Mayor ug Konseho sa Lungsod aron mapadak-an pa ang tinuig nga alokasyon sa SENCITZ BUDGET. Ang tinuig nga budget karon mokabat lamang ug P160,000.00.
Maghimo usab ug representasyon ngadto sa Gobernador ug Kongresman aron mapadayon ang napakgang nga mga benepisyo ug usab aron mapadangat ang mga dugang benepisyo sa mga SENCITZ ning Lungsod.
2. Paghangyo sa Association of Barangay Captains pinaagi sa DSWD ug DILG sa paglakip gayod ug pundong salapi alang sa mga SENCITZ sa ka-Barangayan diha sa BARANGAY GAD PLAN ug nga kini dili ihikaw sa mga senior citizens.
3. Pagpangitag mga pama-agi aron madasig ang mga senior citizens pag-apil sa mga programa sa gobyerno aron sila mahimong tagatampo sa hinugpong nga tingusbawan diha sa ilang na-aning mga katakos ug kaalaman.
4. Pagpangitag pundong salapi aron kasugdan na ang pagtukod sa Senior Citizens Center sa Minglanilla.
5. Pag-reorganisa sa mga Barangay Senior Citizens Chapters aron mahimo silang full-pledged nga NGO o PO ug rehistrado sa Sangguniang Bayan aron makatampo sa pang-gobierno diha sa mga barangay sama sa aktibong pagsalmot sa public biddings, pag-update sa Barangay Development Plan, ug uban pa.
6. Pagtuon pag-usab sa mga reglamento sa Mutual Fund diin ang senior citizen karon PERPETUAL nga magbayad ug P30.00 kada bulan alang sa death benefit nga P7,500.00
Posible ba nga makadawat ug gamayng hinabang ang mga miembro nga milunga pagbayad sa binulang obligasyon.
*Ang MIMUFESCAP mao ang hini-usang gropo sa mga Barangay Senior Citizens Chapters sa Minglanilla:
MINGLANILLA MUNICIPAL FEDERATION OF SENIOR CITIZENS ASSOCIATION OF THE PHILIPPINES
